Rasijski łaŭkoster «Pobieda» (daččynaja kampanija «Aerafłota») zajaviŭ, što pieršy zamiežny rejs ździajśniaje 19 śniežnia pa maršrucie Maskva — Bracisłava. Choć płany ŭ kampanii byli na Minsk.
M. Stułov / Viedomosti
«Ale, na žal, pa žadańni samoha aeraporta abo bazavaha pieravozčyka nam nie tolki nie dali słotaŭ, ale i prapanavali praktyčna zaharadžalnyja taryfy na absłuhoŭvańnie. U nas minimalny košt kvitka nižej, čym prapanavany taryf aeraporta za absłuhoŭvańnie adnaho pasažyra», - kazaŭ pradstaŭnik «Pabiedy» rasijskamu vydańniu «Viedomosti».
Pradstaŭnik Nacyjanalnaha aeraporta «Minsk» Alaksandr Karablikaŭ skazaŭ, što ničoha nie viedaje pra pieramovy pamiž aeraportam i «Pobiedoj». «Biełavija» taksama śćviardžaje, što nie maje dačynieńnia da situacyi.
«Avijakampanija nie maje paŭnamoctvaŭ, kab davać albo nie davać dazvoł na paloty. Usie pytańni treba nakiroŭvać u departamient pa avijacyi», — adkazali ŭ pres-słužbie kampanii.
Vyśvietliłasia, što dakumienty ad rasijskaha łaŭkostera tolki-tolki trapili ŭ Departamient pa avijacyi.
«Dla taho, kab dazvolić ci nie dazvolić vykonvać paloty, da nas pavinien pryjści ceły pakiet dakumientaŭ na akredytacyju ŭ jakaści avijakampanii, jakuju prapanavali da vykanańnia rejsaŭ avijacyjnyja ŭłady Rasii, - raspavioŭ tut.by dyrektar departamienta Uładzimir Kościn. - U departamient dakumienty pryjšli tolki ŭčora ŭviečary, my nie paśpieli ich jašče navat pačać razhladać».
U kancy kastryčnika Rasavijacyja śćviardžała, što «Pobieda» budzie lotać z Maskvy ŭ Minsk pa dva razy na dzień. Čakałasia vysokaja zahružanaść rejsaŭ.
Siońnia ź Minska ŭ Maskvu latajuć tolki «Biełavija» (7 razoŭ na dzień) i «Aerafłot» (5 razoŭ na dzień). Pryčym košty ŭ biełaruskaj avijakampanii nižejšyja.
Ciapier «Pobieda» rychtuje list u Mintrans z prośbaj dapamahčy ŭ arhanizacyi rejsaŭ u Minsk.
