«Vybarčy praces u Biełarusi dehradavaŭ poŭnaściu: raniej nie było narmalnaha padliku hałasoŭ, zaraz niama i narmalnaj ahitacyi», — zajaviŭ staršynia Partyi BNF Alaksiej Janukievič 5 kastryčnika ŭ Minsku na pres-kanfierencyi kampanii nazirańnia «Prava vybaru — 2015».
«My bačym, što na hetych vybarach niama narmalnaj ahitacyi i abmierkavańnia asob kandydataŭ u prezidenty, niama abmierkavańnia peŭnych prablem, jakija isnujuć u hramadstvie», — skazaŭ jon.
Pavodle słoŭ Janukieviča, heta «vielmi dobra bačna na prykładzie temy z rasijskaj vajennaj bazaj». «Mienavita padčas vybarčaj kampanii hučać zajavy z rasijskaha boku, što jany chočuć raźmiaścić u Biełarusi svaju vajennuju bazu. Heta tema vielmi balučaja. Ale my bačym, što pamknieńni hramadzian abmierkavać hetu temu natykajucca na procidziejańnie ŭład. U pryvatnaści, padavalisia zajaŭki pradstaŭnikami Partyi BNF na praviadzieńnie pikietaŭ, ale atrymali admovy. Učora na arhanizataraŭ sustrečy vybarščykaŭ «Za mirnuju, niejtralnuju Biełaruś» byli składzienyja pratakoły», — skazaŭ jon.
Janukievič adznačyŭ, što sioleta ŭłada źviała aśviatleńnie dziaržaŭnymi ŚMI vybarčaj kampanii da ahitacyi za sami vybary, za ŭdzieł u ich. «Mienavita ŭ takim klučy retranślirujucca vykazvańni kandydataŭ u prezidenty», — padkreśliŭ jon.
«Dziejańni ŭład pa źmianieńni zakanadaŭstva, pa jaho prymianieńni pryviali da taho, što na siońnia hramadzianie Biełarusi pazbaŭlenyja mahčymaści rabić svoj vybar uśviadomlena», — kanstatavaŭ Janukievič.
