Infarmavańnie ŭdzielnikaŭ pracesu ab časie i miescy sudovaha razboru praz SMS adpaviadaje zakonu, havorycca ŭ paviedamleńni, raźmieščanym 1 kastryčnika na sajcie Viarchoŭnaha suda Biełarusi.
Nahadajem, hetaja tema ŭźnikła paśla atrymańnia takoha rodu paviedamleńniaŭ arhanizatarami i ŭdzielnikami niesankcyjanavanych akcyj u vieraśni hetaha hoda ŭ Minsku.
«Pry sučasnym raźvićci inavacyjnych technałohij vykarystańnie pieravah mabilnaj suviazi vidavočnaje. SMS-paviedamleńnie — pa sutnaści sudovaja pozva, jakaja vysyłajecca praz SMS, — šyroka vykarystoŭvajecca ŭ krainach z dastatkova vysokim uzroŭniem raźvićcia elektronnaha sudavodstva. Naprykład u Kazachstanie, Rasii, va Ukrainie, u Litvie, — adznačajuć u VS. — U Biełarusi vykarystańnie inšych srodkaŭ suviazi dla nakiravańnia sudovych pozvaŭ, u pryvatnaści takoha vidu sučasnaj kamunikacyi, jak SMS-paviedamleńnie, pra čas i miesca sudovaha pasiadžeńnia jurydyčna zacikaŭlenych u zychodzie spravy asob rehłamientavanaje pracesualnymi normami i dziejnymi ŭ sudach ahulnaj jurysdykcyi instrukcyjami pa spravavodstvie».
Naprykład, plenum Viarchoŭnaha suda ŭ pastanovie ad 21 śniežnia 2012 hoda «Ab praktycy razhladu spraŭ u paradku zavočnaj vytvorčaści» aryjentavaŭ sudy na toje, što adkazčyk pryznajecca naležna paviedamlenym ab časie i miescy sudovaha pasiadžeńnia pry vykanańni patrabavańniaŭ ab źmieście sudovaha paviedamleńnia, sposabie i terminie jaho ŭručeńnia (artykuły 143—145), a ŭ vypadkach pražyvańnia adkazčyka za miežami Biełarusi — pry vykanańni pałažeńniaŭ mižnarodnych dahavoraŭ, u pryvatnaści Kanviencyi ab pravavoj dapamozie i pravavych adnosinach pa hramadzianskich, siamiejnych i kryminalnych spravach, ažyćcioŭlenaj u Minsku 22 studzienia 1993 hoda, i pratakoła da jaje, padpisanaha ŭ Maskvie 28 sakavika 1997 hoda, Kanviencyi ab pravavoj dapamozie i pravavych adnosinach pa hramadzianskich, siamiejnych i kryminalnych spravach, ažyćcioŭlenaj u Kišyniovie 7 kastryčnika 2002 hoda.
Pry hetym sposab sudovaha paviedamleńnia pavinien zabiaśpiečvać jaho fiksavańnie (častka 2 artykuła 143 HPK). U nieabchodnych vypadkach infarmavańnie dapuskajecca z vykarystańniem elektrasuviazi (telefanahramy, SMS-paviedamleńnia) pry fiksacyi fakta adpraŭleńnia i dastaŭki takoha paviedamleńnia adrasatu.
Pry razhladzie ekanamičnych spraŭ sud taksama maje prava prainfarmavać udzielnikaŭ pracesu praz telefanahramu, telehramu, faksimilnuju suviaź, internet, u tym liku elektronnuju poštu, a taksama z vykarystańniem inšych srodkaŭ suviazi, jakija zabiaśpiečvajuć fiksavańnie fakta paviedamleńnia abo vykliku, u paradku, ustanoŭlenym zakanadaŭstvam (artykuł 140 HPK).
Dapuščalnaść infarmavańnia praz SMS praduhledžanaja i PVKoAP, adznačajecca ŭ paviedamleńni Viarchoŭnaha suda.
Da prykładu, zhodna z častkaj 1 artykuła 10.9 Pracesualna-vykanaŭčaha kodeksa ab administracyjnych pravaparušeńniach asoba, jakaja ŭdzielničaje ŭ administracyjnym pracesie, vyklikajecca ŭ sud, orhan, jaki viadzie administracyjny praces, pozvaj, što ŭručajecca hetaj asobie pad raśpisku, a ŭ vypadku jaje časovaj adsutnaści — paŭnaletniamu členu jaje siamji, najmalniku, ź jakim jana znachodzicca ŭ pracoŭnych adnosinach, administracyi ŭstanovy adukacyi, u jakoj jana vučycca. Jurydyčnaja asoba, jakaja ŭdzielničaje ŭ administracyjnym pracesie, pra vyklik jaje pradstaŭnika ŭ sud, orhan, što viadzie administracyjny praces, infarmujecca pozvaj, nakiravanaj pa miescy znachodžańnia jurydyčnaj asoby. Vyklik asobaŭ, jakija ŭdzielničajuć u administracyjnym pracesie, moža być zrobleny taksama pozvaj, što vysyłajecca pa pošcie, telefanahramaj abo z vykarystańniem inšych srodkaŭ suviazi.
Instrukcyi pa spravavodstvie, dziejnyja ŭ sudach ahulnaj jurysdykcyi, taksama ŭtrymlivajuć ukazańnie ab dapuščalnaści paviedamleńnia praz SMS. U pryvatnaści punkt 106 raździeła 7 «Padrychtoŭka spravy da sudovaha pasiadžeńnia» instrukcyi pa spravavodstvie ŭ rajonnych (haradskich) sudach, zaćvierdžanaj zahadam staršyni VS ad 6 kastryčnika 2014 hoda № 81, vyznačaje, što sposab sudovaha paviedamleńnia i vykliku asobaŭ pavinien zabiaśpiečvać ich fiksavańnie. Asoby mohuć być vyklikanyja ŭ sudovaje pasiadžeńnie telefanahramaj, telehramaj, praz elektronnyja i SMS-paviedamleńni pry fiksacyi fakta adpraŭleńnia i dastaŭki takoha paviedamleńnia adrasatu. Ab ažyćciaŭleńni nazvanych dziejańniaŭ sakratarom sudovaha pasiadžeńnia — pamočnikam sudździ składajecca daviedka, jakaja dałučajecca da materyjałaŭ spravy.
«Takim čynam, infarmavańnie ŭdzielnikaŭ sudovaha pracesu ab časie i miescy sudovaha pasiadžeńnia praz nakiravańnie SMS-paviedamleńnia, kali jano adpaviadaje źmiestu sudovaj pozvy i zafiksavany fakt jaho adpraŭleńnia i dastaŭki, źjaŭlajecca naležnym», — havorycca ŭ paviedamleńni VS.
