Kampanija Google zapuściła «YouTube Biełaruś» — łakalizavanuju viersiju papularnaj videapłatformy, jakaja dazvolić biełaruskim karystalnikam internetu kamunikavać, stvarać videa i dzialicca im na damienie youtube.by.
Jak paviedamlajecca ŭ pres-relizie Google, łakalnaja viersija YouTube prezientuje samyja papularnyja biełaruskija videaroliki i adkryje novyja mahčymaści dla talenavitych stvaralnikaŭ videakantentu, błohieraŭ, telekampanij, rekłamadaŭcaŭ i brendaŭ ź Biełarusi.
Biełarusy ŭžo daŭno hladziać i zahružajuć videa na hłabalnym damienie youtube.com, stvarajuć ułasny videakantent. Pavodle źviestak daśledčaj kampanii TNS, achop YouTube ŭ Biełarusi składaje 64% internet-karystalnikaŭ starejšych za 18 hadoŭ. Kožny treci hladzić anłajn-videa hetak ža časta, jak i TB, a 27% — zachodziać na płatformu štodzionna. Biełaruski karystalnik YouTube addaje pieravahu muzycy, kamiedyjnym šou, dziciačamu kantentu, amatarskim videa, videainstrukcyjam.
«Aficyjny zapusk YouTube ŭ Biełarusi dazvolić biełaruskim stvaralnikam videakantentu bolš efiektyŭna prapahandavać svaje roliki nie tolki ŭ krainie, ale i va ŭsim śviecie. Tym samym kampanija Google budzie sadziejničać raźvićciu błahaśfiery Biełarusi i vystupić kansultantam dla biełaruskich videabłohieraŭ, aŭdytoryja jakich pastajanna raście. Užo siońnia, pavodle našych źviestak, 49% karystalnikaŭ bajnetu farmirujuć mierkavańnie i prymajuć rašeńnie ab kupli čaho-niebudź paśla prahladu videa na YouTube. Taksama dla bolš praduktyŭnaha supracoŭnictva błohieraŭ i biźniesu my zapuskajem u Biełarusi partniorskuju prahramu YouTube», — prakamientavała zapusk łakalnaj viersii YouTube Natalla Karabko, mieniedžar Google pa raźvićci biźniesu ŭ Biełarusi.
Ciapier luby biełaruski karystalnik YouTube, jaki stvaraje aryhinalny kantent, moža stać udzielnikam partniorskaj prahramy YouTube i aktyvavać manietyzacyju. YouTube raźmiaščaje rekłamu na kanałach karystalnikaŭ — udzielnikaŭ partniorskaj prahramy, a aŭtary kantentu samastojna vyznačajuć, jakija videa manietyzavać, a jakija pakinuć biez rekłamy. Dachod ad pakazu rekłamy ŭ videarolikach nie adzinaja pieravaha partniorskaj prahramy, u partnioraŭ taksama jość mahčymaść pašyrać aŭdytoryju svajho kanała i sačyć za jaho efiektyŭnaściu.
