Hienieralny dyrektar Dziaržfilmafondu Rasii Mikałaj Baradačoŭ abviarhaje infarmacyju, što Alaksandr Łukašenka vydzielić 2 młn. dołaraŭ na film z udziełam Žerara Depardjo.
28 vieraśnia rasijskaja hazieta «Iźviestija» sa spasyłkaj na Baradačova paviedamiła, što Łukašenka vydzielić 2 młn. dołaraŭ na film «Narmandyja-Nioman», dzie syhraje Depardjo. U razmovie z karespandentam BiełaPAN kiraŭnik Dziaržfilmafondu abvierh hetu infarmacyju i zajaviŭ, što jaho niapravilna zrazumieli.
«Ja viedaju, što Biełaruś padtrymała ideju, ale pra biudžet možna havaryć tolki paśla zakančeńnia vytvorčaści. My nie viedajem, kolki hrošaj daść Łukašenka», — rastłumačyŭ jon.
Pra ŭdzieł Biełarusi ŭ prajekcie «Narmandyja-Nioman» stała viadoma paśla sustrečy Depardjo z Łukašenkam. Francuzski akcior razam sa svaim pradziusieram Arno Fryli naviedali Minsk u lipieni hetaha hoda.
«Pracujučy nad prajektam «Narmandyja-Nioman», my pastarajemsia na asnovie śviedčańniaŭ ludziej — udzielnikaŭ tych padziej, uklučajučy hienierała de Hola, jaki apisaŭ ich u svaich miemuarach, adnavić praŭdu, realnuju historyju pałka», — kazaŭ Depardjo, zaznačajučy, što syhraje adnu z hałoŭnych rolaŭ u kinakarcinie.
Pavodle słoŭ Baradačova, francuzskamu akcioru daduć usio-taki druharadnuju rolu — miechanika ci padobnaha piersanažu. Imiony inšych viadomych akcioraŭ, jakija buduć zadziejničanyja ŭ filmie, pakul nie nazyvajuć, jak i toje, chto budzie režysioram i scenarystam.
«Zaraz prajekt znachodzicca ŭ raspracoŭcy, arhanizacyjnyja pytańni vyrašanyja na 30-40%», — zajaviŭ Baradačoŭ.
Ahulnaja suma biudžetu filma taksama nie abviaščajecca. Nieviadoma, jakuju sumu vydzielać rasijski i francuzski baki, jakija zajavili pra ŭdzieł u realizacyi prajekta. Ab roli Biełarusi Baradačoŭ zajaviŭ: «Kali Žerar damoviŭsia pa hetym pytańni, znajšoŭ razumieńnie — značyć, Biełaruś taksama budzie akazvać niejkija pasłuhi».
Hiendyrektar Dziaržfilmafondu zajaviŭ, što zdymki «Narmandyi-Niomana» projduć u 2016—2017 hadach. Heta budzie šmatsieryjny film.
U Ministerstvie kultury Biełarusi zajavili, što nie majuć infarmacyi ab vydzialeńni 2 młn. dołaraŭ na film «Narmandyja-Nioman». Taki ž adkaz BiełaPAN atrymaŭ na kinastudyi «Biełaruśfilm».
Pres-sakratar Ministerstva finansaŭ Iryna Komar na pytańnie, ci sapraŭdy ministr sustrakaŭsia z Łukašenkam nakont prajekta «Narmandyja-Nioman» i ci budzie vydzielena ź biudžetu 2 młn. dołaraŭ na hety film, zajaviła, što «pakul ministerstva ničoha nie budzie kamientavać nakont hetaha».
Zaznačym, što ŭ respublikanskim biudžecie 2015 hoda na padtrymku kiniematohrafa zakładziena 65 młrd. rubloŭ — pa siońniašnim kursu heta 3,7 młn. dołaraŭ.
Miž tym u kiniematahrafičnych kołach kažuć, što ab padtrymcy filma «Narmandyja-Nioman» jość pryncypovaje rašeńnie Łukašenki. Pra heta paviedamiŭ režysior i scenaryst Andrej Kurejčyk.
