Praz padzieńnie viežavaha krana na vulicy Hrušaŭskaj u Minsku ranicaj 28 vieraśnia 20 pryvatnych damoŭ zastajucca biez elektryčnaści, paviedamlaje pres-słužba Minskaha haradskoha ŭpraŭleńnia MNS.
Infarmacyja ab zdareńni pastupiła ŭ MNS siońnia kala 8.00. Kran upaŭ na adzin z damoŭ u pryvatnym siektary, jaki padlahaje znosu.
Ustanoŭlena, što pry budaŭnictvie 16-paviarchovaha šmatkvaternaha doma ŭpaŭ 10-tonny kran 1989 hoda vypusku, paviedamlaje pres-słužba. U adnym z pryvatnych damoŭ paškodžana draŭlanaja ściana, dach, pierakryćcio na ahulnaj płoščy 20 kv. m. Paškodžany taksama pavietranaja linija elektrapieradačy (biez elektrazabieśpiačeńnia zastajucca 20 pryvatnych žyłych damoŭ pa vulicy Hrušaŭskaj i 5-m Čyhunačnym zavułku) i pavietrany stalny hazapravod (ad sistemy hazazabieśpiačeńnia adklučany try pryvatnyja damy).
U domie, na jaki ŭpaŭ kran, znachodzilisia try čałavieki, jany nie paciarpieli. Kranaŭščyk 1990 hoda naradžeńnia sa spałučanymi traŭmami siaredniaj stupieni ciažkaści, adkrytaj čerapna-mazhavoj traŭmaj siaredniaj stupieni ciažkaści, paškodžańniem pajaśnična-kryžavoha adździeła pazvanočnika dastaŭleny ŭ haradskuju kliničnuju balnicu chutkaj miedycynskaj dapamohi.
Pryčyna zdareńnia ŭstanaŭlivajecca. Dla likvidacyi nastupstvaŭ padzieńnia krana arhanizavana kamisija pa nadzvyčajnych situacyjach pry administracyi Maskoŭskaha rajona Minska, na jakoj pryniata rašeńnie ab adsialeńni žycharoŭ paškodžanaha doma. Ich časova pierasielać u padmienny fond vykankama rajona.
«Na miescy zdareńnia viaducca avaryjna-ratavalnyja i adnaŭlenčyja raboty, pracuje kamisija pa ŭstanaŭleńni pryčyn zdareńnia, ź vidavočcami pracuje psichołah MNS», — paviedamlaje pres-słužba.
Jak paviedamlaje dziaržaŭnaje ahienctva BiełTA, zdareńnia siońnia razhladałasia na apieratyŭnaj naradzie ŭ Minharvykankamie. Pieršy namieśnik staršyni vykankama Uładzimir Kucharaŭ rasparadziŭsia na praciahu miesiaca zabiaśpiečyć žycharoŭ paškodžanaha doma novym žyllom. U stalicy budzie praviedziena pravierka stanu ŭsich budaŭničych kranaŭ.
Ekśpierty aceniać stan paškodžanaha doma i vyznačać, ci padlahaje jon adnaŭleńniu. «U vypadku znosu pastajannaje žyllo paciarpiełym (u domie prapisana vosiem čałaviek, žyli troje) pavinna budzie pradastavić vinavataja ŭ zdareńni arhanizacyja», — adznačyŭ kiraŭnik administracyi Maskoŭskaha rajona Minska Alaksandr Krepak.
