Pryrodaachoŭnaja arhanizacyja «Ekałahičnaja vachta Sachalina» zajaviła, što viarnuła ŭ fond Leanarda Dzi Kaprya hrošy, atrymanyja na zachavańnie zakaźnika «Uschodni» i prylehłych da jaho dzikich rek.
U paviedamleńni na sajcie arhanizacyi havorycca, što atrymanyja srodki ŭ pamiery 159 tysiač dalaraŭ užo viernutyja ŭ fond. Takoje rašeńnie było pryniata «Ekavachtaj Sachalina» dla taho, kab damahčysia vyklučeńnia z rejestra zamiežnych ahientaŭ.
Akramia taho, z toj ža metaj arhanizacyja maje namier u bližejšy čas viarnuć zamiežnaj niekamiercyjnaj arhanizacyi «Centr dzikaha łasosia» 30 tysiač dalaraŭ, atrymanych na abaronu i zachavańnie dzikich papulacyj cichaakijanskich łasosiaŭ.
Arhanizacyja nastojvaje, što ŭ ministerstva justycyi nie było padstaŭ ŭklučać jaje ŭ rejestr zamiežnych ahientaŭ, pakolki jana nie zajmajecca palityčnaj dziejnaściu. Adnak na ŭsialaki vypadak ekołahi admovilisia ad zamiežnaha finansavańnia.
Ciapier «Ekavachta Sachalina» maje namier isnavać na achviaravańni z boku žycharoŭ vostrava, a taksama damahacca źniaćcia statusu zamiežnaha ahienta praz sud. U vypadku admovy arhanizacyja paabiacała spynić svaju dziejnaść.
Raniej «Ekavachta Sachalina» užo admoviłasia ad srodkaŭ, atrymanych ad dabračynnaha fondu Mota, bo Saviet Fiederacyi unios jaho ŭ nieaficyjny prajekt śpisu niepažadanych arhanizacyj.
«Ekałahičnaja vachta Sachalina» isnuje z 1995 hoda. Spačatku jana pracavała jak niefarmalnaja arhanizacyja, a ŭ 1997 hodzie była zarehistravanaja aficyjna. Dziejnaść «Ekavachty Sachalina» nakiravanaja na zachavańnie dzikaj pryrody.
Arhanizacyja finansujecca za košt dabračynnych achviaravańniaŭ, hrantaŭ i členskich uznosaŭ. U rejestr zamiežnych ahientaŭ «Ekavachtu Sachalina» ŭnieśli 15 vieraśnia. Nahodaj stała toje, što arhanizacyja stavić svajoj zadačaj ŭździejańnie na orhany dziaržaŭnaj ułady.