Mahčymy vyhlad Homo naledi. Vyjava: John Gurche, National Geographic
Rekanstrukcyja čerapa Homo naledi i čerap sučasnaha čałavieka na fonie. Vyjava: Stefan Fichtel, National Geographic
U piačory ŭ 45 kiłamietrach ad Jochanesburha (Paŭdniovaja Afryka) ŭ 2013 hodzie antrapołah Li Bierhier znajšoŭ paŭtary tysiačy kostak prynamsi 15 istot, padobnych da čałavieka. Jak pakazała daśledavańnie, hetyja kostki naležać raniej nieviadomamu vidu, što atrymaŭ nazvu Homo naledi, raspaviadaje National Geographic.
Homo naledi mieli rost kala 1,5 mietra i vahu kala 45 kiłahram. Kostki tazu nahadvajuć takija ŭ aŭstrałapitekaŭ, što žyli 4 miljony hod tamu, a stupni — jak u nas, Homo sapiens. Abjom mozhu ŭdvaja mienšy za sučasnaha čałavieka.
Jak prafiesar Bierhier raspavioŭ Associated Press, uzrost Homo naledi chutčej za ŭsio składaje ad 2,5 da 2,8 młn hod, ale ŭłasna znojdzienyja kostki mohuć być i maładziejšymi. Ale dakładny ŭzrost pakul nieviadomy. Kali jany žyli kala troch miljonaŭ hod, to Homo naledi vydatna prademanstruje toje, što evalucyja pieršych z rodu Homo išła davoli raznastajna. A kali žyli značna paźniej — što jany dla svajho času byli «žyvymi vykapniami», jakija zachavali prymityŭnyja rysy prodkaŭ.
Kostki byli znojdzienyja ŭ piačornym kompleksie Dynaledzi, u honar jakoha i byŭ nazvany vid. Što dziŭna, uvachod u piačoru byŭ nastolki vuzkim, što tudy ledź praleźli samyja «kampaktnyja» daśledčyki.
Fota: University of the Witwatersrand
Schiema piačory. Vyjava: Jason Treat, National Geographic
Jak u piačory akazalisia kostki staražytnych ludziej — zahadka. Mahčyma navat, što piačora — miesca pachavańnia. Kali heta niejkim čynam paćvierdzicca, nas čakaje siensacyja: pra isnavańnie pachavalnych abradaŭ u takich prymityŭnych rodzičaŭ čałavieka raniej i padumać nie mahli.
Ź inšaha boku, kostki mahli być zakinutyja ŭ piačoru i značna paźniej. Niekatoryja navukoŭcy abviarhajuć i hałoŭnuju vysnovu hrupy Bierhiera: niechta kaža, što ŭ piačory nie adzin, a dva vidy, niekatoryja — što heta nie novy vid, a vielmi niezvyčajnyja Homo erectus (jakija žyli 1,6 młn hod tamu). Tak ci inačaj, hetaja znachodka — najvialikšaja ŭ Afrycy za ŭsiu historyju.
Źleva naprava: aŭstrałapitek, Homo erectus, Homo naledi. Vyjava: Lee Berger, National Geographic
