Kiraŭnik Śledčaha kamiteta RF Alaksandr Bastrykin zajaviŭ, što premjer Ukrainy Arsienij Jacaniuk vajavaŭ u Čačni suprać Rasii.
Reuters.com
Pavodle jaho słoŭ, u rasijskich śledčych u suviazi z vajnoj u Čačni 1994—1995 hadoŭ jość pytańni da ŭkraincaŭ Dźmitryja Karčynskaha, Ihara Mazura, Valeryja Babroviča z UNA-UNSA, lidara «Pravaha siektara» Dźmitryja Jaraša, lidara «Svabody» Aleha Ciahniboka i jaho brata Andreja.
«Śledstvam taksama ŭstanoŭlena, što ŭ hetyja ž hady razam ź imi ŭ składzie karnaha atrada «Arho», a zatym «Vikinh», jakim kiravaŭ Alaksandr Muzyčka, suprać rasijskich vajskoŭcaŭ vajavaŭ Arsień Jacaniuk», — zajaviŭ Bastrykin.
«Pa dadzienych śledstva, Jacaniuk braŭ udzieł jak minimum u dvuch uzbrojenych sutyknieńniach, jakija adbyvalisia 31 śniežnia 1994 na płoščy «Minutka» ŭ horadzie Hrozny i ŭ lutym 1995 hoda ŭ rajonie haradskoj balnicy №9 horada Hrozny, a taksama ŭ katavańniach i rasstrełach pałonnych», — dadaŭ jon.
Akramia taho, Bastrykin zapeŭnivaje, što Jacaniuk u śniežni 1995 hoda byŭ uznaharodžany najvyšejšaj uznaharodaj Džachara Dudajeva «Honar nacyi».
Pavodle aficyjnaj bijahrafii Arsienija Jacaniuka, jon naradziŭsia ŭ 1974 h. a ŭ 1995 hodzie jašče vučyŭsia na jurydyčnym fakultecie Čarnavickaha ŭniviersiteta.
Va ŭradzie Ukrainy nazvali prapahandysckaj zajavu Śledčaha kamiteta Rasii. Pra heta napisała ŭ fejsbuku ŭ aŭtorak, 8 vieraśnia, pres-sakratar premjer-ministra Volha Łapo.
«My raim rasijskamu režymu pravieści psichijatryčnuju ekśpiertyzu kiraŭnika Śledčaha kamiteta Bastrykina», — adznačyła jana.
Łapo nahadała, što kiraŭnik SK «cynična asudziŭ Nadzieju Saŭčanka, Aleha Siancova dy inšych ukrainskich patryjotaŭ».
