Čamu by Marsu nie być takim, jak hetaja zaśniežanaja pustelnia ŭ Siryi? Fota: shunya.net
Navukoŭcy vysunuli novuju teoryju ab tym, kudy padziełasia atmaśfiera Marsa, raspaviadaje NASA sa spasyłkaj na daśledavańnie, apublikavanaje ŭ časopisie Geology.
Niekali Mars mieŭ značna bolš ščylnuju atmaśfieru pieravažna z vuhlakisłaha hazu. Mahčyma, jana źnikła nie paśla taho, jak vada sfarmavała sučasnyja daliny i pojmy — u «vodnyja časy» ŭžo mahło być dosyć chałodna, kala nula.
Daśledčyki znajšli paćvierdžańnie taho, što vuhlakisły haz nie byŭ pahłynuty padziemnymi parodami, a chutčej za ŭsio vylacieŭ u kosmas — pry čym padčas taho, jak farmavalisia daliny.
U marsijanskim hruncie jany znajšli zanadta małuju kolkaść karbanataŭ (solaŭ z vady, ščołačy i vuhlakisłaha hazu), što značyć, što vuhlakisły haz z atmaśfiery hleba nie zachoŭvała. Pa ich padlikach, jany pavinny byli b pabačyć u 35 raz bolš adkładaŭ karbanataŭ, kali b teoryja ab «ciopłym i mokrym» Marsie była praŭdzivaj.
«Mo atmaśfiera nie była nastolki toŭstaj ŭ momant farmavańnia sietki dalin, — kaža daśledčyk Hieałahičnaj słužby ZŠA Krystafier Edvards. — Zamiest taho, kab Mars byŭ mokrym i ciopłym, mahčyma, jon byŭ chałodnym i vilhotnym z atmaśfieraj, što ŭžo stała tonkaj. Nakolki ciopła maje być, kab sfarmavałasia dalina? Nie asabliva. U bolšaści miescaŭ vy mahli b pabačyć śnieh i lod zamiest daždžu. Treba być tolki krychu vyšej za punkt zamiarzańnia, kab atrymać vadu, što budzie rastavać i ciačy z časam, i heta nie patrabuje vielmi šmat atmaśfiery».
Sučasnaja atmaśfiera Marsa zanadta tonkaja, kab na čyrvonaj płaniecie mahła isnavać vada ŭ vadkim stanie. Ale navukoŭcy z dapamohaj marsachoda Curiosity znajšli ślady kolišnich marsijanskich azioraŭ, a na spadarožnikavych zdymkach pabačyli i ledaviki pad płastam pyłu. Viadoma, što aziory na Marsie źjaŭlalisia i źnikali prynamsi dvojčy.
