Polskija mytniki spynili kantrabandu biełaruskich cyharet na paŭmiljona dalaraŭ. Hruz byŭ zamuravany ŭ bietonnym pralocie mosta.
Jak paviedamlaje pres-słužba Mytnaj słužby Polščy, usiaho było kanfiskavana 185 tysiač pačkaŭ cyharet marki «Fest» vytvorčaści haradzienskaj tytuniovaj fabryki «Nioman». Kantrabanda na sumu bolš za $500 tysiač była znajdzienaja ŭ rajonie polska-litoŭskaj miažy. Dziasiatki tysiač pačkaŭ cyharet byli schavanyja ŭnutry 20-tonnaha pralota mosta, jaki pa pradstaŭlenych kiroŭcam dakumientach pieravoziŭsia z Maskvy ŭ Polšču.
Cyharety znajšli ŭ vyniku pravierki bietonnaha hruzu z dapamohaj renthienu. A kab dastać ich z takoha chitraha tajnika, spatrebiŭsia śpiecyjalny kran i instrumienty.
Za rulom hruzavika znachodziŭsia 33-hadovy hramadzianin Biełarusi, jon zatrymany. Raspačataja kryminalnaja sprava. Za niezakonny ŭvoz cyharet biełarusu pahražaje pakarańnie da 10 hadoŭ pazbaŭleńnia voli.
U ciapierašni čas polskija śledčyja sprabujuć vyznačyć, adkul na samaj spravie vieźli cyharety i chto pavinien byŭ być faktyčnym atrymalnikam hruzu.
