U sieradu ŭ pierapynku sumiesnaha pasiedžańnia deputataŭ dźviuch pałat nacyjanalnaha schodu Biełarusi ŭ Avalnaj zali ŭpieršyniu paśla zychodu z pasady kiraŭnika pałaty pradstaŭnikoŭ źjaviŭsia Ŭładzimier Kanaploŭ, pieradaje radyjo "Svaboda".
Źniešnie jon mocna źmianiŭsia: schudnieŭ, koratka pastryhsia, hustaja barada pieratvaryłasia ŭ maleńkuju espańjołku. Ad hutarki z žurnalistami eks-śpikier uchiliŭsia.
Adzin z kaleh Uładzimiera Kanaplova pa deputackamu korpusu paśla razmovy ź im raskazaŭ mnie nastupnaje:
“Uładzimier Mikałajevič skazaŭ, što jon pieranios až šeść aperacyjaŭ. Ciapier jon adčuvaje siabie lepš.
Kanaploŭ kateharyčna abviarhaje paviedamleńni niekatorych medyjaŭ pra jahony ŭdzieł u niejkich finansavych machinacyjach. Nad svaimi budučymi planami jon razvažaje. Ale havoryć, što pa-raniejšamu zastajecca ščyrym prychilnikam Alaksandra Łukašenki”.
A voś što paviedamlaje "Narodnaja vola":
Paśla aperacyj, jakija Ŭładzimieru Kanaplovu zrabili ŭ Rasiei, u jaho amal źnikła barada. Ciapier Uładzimier Kanaploŭ maje karotkuju fryzuru i adznačaje, što pa-raniejšamu zastajecca addanym kursu prezydenta. «Trochi rohi adrezali, a tak usio dobra», — žartaŭliva adznačyŭ pra stan svajho zdaroŭja Ŭładzimier Kanaploŭ.
Były śpikier pałaty pradstaŭnikoŭ raskazaŭ u interviju «Narodnaj voli», što, zajmajučysia svaim zdaroŭjem, sačyŭ za tymi čutkami, jakija šyrylisia vakoł jaho adstaŭki.
«Rady, što pra mianie adrazu dali stolki infarmacyi… Ja zdahadvajusia, chto i čyj zakaz vykonvaŭ… A ŭvohule ŭdziačny apazycyjnaj presie i žurnalistam, što jany nie pisali pra mianie nijakich paskudztvaŭ», — uspaminaje Ŭładzimier Kanaploŭ.
Były śpikier paviedamiŭ, što aperavali jaho ŭ Sankt-Pieciarburhu, a nia ŭ Miensku.
«Sprava ŭ tym, što ŭ nas pazuchi nidzie nie ŭskryvajuć. A mnie na adnoj pazusie zrabili šeść aperacyj. Aperavaŭ mianie viadomy piecierburcki chirurh-otalarynholah prafesar Sitnikaŭ. Jon doŭhi čas pracavaŭ u Biełarusi, a ciapier pracuje ŭ Vajskova-medyčnaj akademii ŭ Sankt-Pieciarburhu», — paviedamiŭ Uładzimier Kanaploŭ.
Raspaviadajučy pra svaju palityčnuju budučyniu, Kanaploŭ kateharyčna abvierh čutki pra toje, što źbirajecca vystaŭlać svaju kandydaturu na post prezydenta. «Heta tolki maje niepryjacieli mohuć tak skazać. Čałaviek, jaki stolki hod byŭ razam z prezydentam, i dalej budzie razam ź im», — zajaviŭ U. Kanaploŭ.
