Nadzvyčajny i paŭnamocny pasoł Hruzii ŭ Biełarusi David Załkalijani prybudzie ŭ Minsk u najbližejšy čas, paviedamlaje IA «Novosti-Hruzija» sa spasyłkaj na hruzinskaje MZS.
Nahadajem, D.Załkalijani byŭ pryznačany na pasadu nadzvyčajnaha i paŭnamocnaha pasła ŭ Biełarusi ŭ vieraśni. Raniej zajmaŭ pasadu dyrektara departamienta hłabalnych adnosin MZS Hruzii. U intervju BiełaPAN paśla svajho pryznačeńnia dypłamat zajaviŭ: «Jedu z namieram paśladoŭna ŭmacoŭvać našy dvuchbakovyja adnosiny. U hetych adnosinaŭ ciapier dobry fon, asabliva paśla pryjezdu ŭ Minsk ministra ŭnutranych spraŭ Vano Mierabišvili (18 vieraśnia). Vykazvańni, što prahučali na sustrečy ź biełaruskim prezidentam, vielmi abnadziejvajuć». Pavodle słoŭ D.Załkalijani, asablivy ŭpor u svajoj pracy jon maje namier zrabić na raźvićci dvuchbakovych ekanamičnych suviaziej.
Pasoł nie ličyć, što raniej adnosiny Biełarusi i Hruzyi byli kanfrantacyjnymi. «U čas uskładnieńnia adnosin Hruzii i Rasii Biełaruś nie ŭviała sankcyi ŭ dačynieńni da hruzinskich tavaraŭ i zachavała svabodu pierasoŭvańnia dla hramadzian Hruzii, pakinuŭšy ŭ dziejańni biaźvizavy režym. Spadziajusia, tak budzie i nadalej», — zaznačyŭ jon.
Pavodle słoŭ dypłamata, u Minsk jon źbirajecca pryjechać adzin. Siamja, dzie vychoŭvajucca dźvie dački (13 i 11 hadoŭ), pakul zastaniecca ŭ Hruzii.
***
David Załkalijani naradziŭsia 27 lutaha 1968 h. u Tbilisi. Karjerny dypłamat. Skončyŭ jurydyčny fakultet Tbiliskaha dziaržaŭnaha univiersiteta pa śpiecyjalnaści juryst-mižnarodnik. U MZS Hruzii z 1992 hoda. U 1996—2004 hadach pracavaŭ u pasolstvach svajoj krainy ŭ Aŭstryi i ZŠA, źjaŭlaŭsia namieśnikam pasła Hruzii pry ABSIE. Z 2004 pa 2007 hady — pasoł va Uźbiekistanie i Tadžykistanie. Sa studzienia 2007 hoda — dyrektar departamienta hłabalnych adnosin hruzinskaha MZS.
