Nahacinski rajonny sud Maskvy vynies rašeńnie ab pazbaŭleńni pravoŭ ułasnaści na kvateru jaje ŭładalnikaŭ, jakija zrabili niezakonnuju pierapłaniroŭku. U Rasii takoje rašeńnie pryniata sudom ŭpieršyniu. Pra heta havorycca ŭ paviedamleńniach na sajcie Masžylinśpiekcyi.
U 2010 hodzie ŭłaśniki kvatery ŭ domie na vulicy Biruloŭskaj źnieśli apornuju ścianu pamiž pakojami. Masžylinśpiekcyja paśla pravierki kvatery vydała im pradpisańnie ab pryviadzieńni pamiaškańnia ŭ pieršapačatkovy stan. Pa dadzienych inśpiektaraŭ, takaja pierapłaniroŭka mahła vyklikać abrušeńnie i stvaryła pahrozu žyćciu i zdaroŭju žycharoŭ doma. Pravieryć vykanańnie pradpisańnia inśpiektary nie mahli na praciahu troch hadoŭ — uładalniki ihnaravali hetyja sproby. U traŭni 2013 Masžylinśpiekcyja źviarnułasia ŭ sud.
Pa rašeńni suda kvatera budzie pradadzienaja z publičnych tarhoŭ. Z sumy, atrymanaj ad prodažu, buduć vyličanyja vydatki na vykanańnie sudovaha rašeńnia, astatnija srodki buduć pieradadzienyja byłym ułaśnikam kvatery. Pryvieści kvateru ŭ raniejšy stan pavinien budzie jaje novy ŭładalnik.
Pazbaŭleńnie pravoŭ ułasnaści na žyllo praz sud u padobnych vypadkach praduhledžana artykułam 5 Zakona horada Maskvy «Ab paradku pierabudovy pamiaškańniaŭ u žyłych damach na terytoryi horada Maskvy».
Isnuje pieralik mahčymych źmianieńniaŭ, jakija nie dapuskajucca ŭ kvaterach žyłych damoŭ. U jaho, u pryvatnaści, uvachodziać pierapłaniroŭka ŭ damach, pryznanych avaryjnymi, pavieličeńnie nahruzki na apornyja kanstrukcyi, parušeńnie patrabavańniaŭ budaŭničych, sanitarna-hihijeničnych, ekspłuatacyjnych normaŭ i praviłaŭ pažarnaj biaśpieki dla šmatkvaternych damoŭ, a taksama parušeńnie tryvałaści i ŭstojlivaści apornych kanstrukcyj budynka, pry jakim moža adbycca ich razbureńnie.
