Hurt na čale ź Siarhiejem Michałkom u čas proma-kampanii svajho biełaruskamoŭnaha albomu «Hraj» vyrašyŭ pisacca pa-biełarusku jak «Lapis Trubiacki».
Dahetul nazva hurta ŭ aficyjnych biełaruskamoŭnych pres-relizach dy prezentacyjach biełaruskamoŭnych piesień, u tym liku i na «Tuzinie Hitoŭ», pisałasia jak «Lapis Trubiackoj».
Ale ciapier napisańnie vyrašana było źmianić — na ŭsioj pradukcyi, źviazanaj ź biełaruskamoŭnym albomam, napisana «Lapis Trubiacki».
Pres-ataše hurta pa Biełarusi Źmicier Biezkaravajny ŭdakładniŭ, što heta i jość aficyjna pryniataja na siońnia nazva hurta ŭ biełaruskim varyjancie.
Tuzin.fm. paprasiŭ prakamentavać novaje napisańnie hurta movaznaŭcu Źmitra Saŭku, suaŭtara knihi «Biełaruski klasyčny pravapis. Zbor praviłaŭ»: Heta nia moŭnaja prablema, a histaryčna-kulturnickaja.
Z adnaho boku, Trubiackija — proźvišča rasiejskaha bajarskaha rodu, tamu tut treba zachavać kančatak -oj, jak heta robicca ŭ dačynieńni adnatypnych proźviščaŭ, naprykład Tałstoj.
Adnak Trubiackija vyvodziacca z Hiedziminavičaŭ, tamu ich možna razhladać jak fenomen i biełaruskaj historyi dy kultury.
Takim čynam, jość padstava padavać hetaje proźvišča ŭ formie, ułaścivaj biełaruskim prymietnikavym proźviščam, —Trubiacki. Kančatkovaje raźviazańnie zaležyć ad vybaru samoha hurta.
Tak što vychodzić, što kali «Lapisy» adčuli siabie da kanca častkaj biełaruskaj historyi i kultury, tady i stali «Trubiackimi». Z čym my ich i vinšujem!
