Doŭhačakany prajekt zakona «Ab biełarusach zamiežža» pastupiŭ u pałatu pradstaŭnikoŭ.
Heta nie pieršy raz, kali prajekt zakona paśla ŭzhadnieńnia pamiž usimi zacikaŭlenymi dziaržaŭnymi ŭstanovami faktyčna dajšoŭ da apošniaj stadyi razhladu. Takoje ŭžo było ŭ 2002 hodzie. Tady prajekt zakona mieŭ nazvu «Ab suajčyńnikach, jakija pražyvajuć za miažoj», ale ź niezrazumiełych pryčynaŭ pryniaćcie zakona tak i nie adbyłosia, i jon nadoŭha vypaŭ z pryjarytetaŭ dziaržaŭnaj zamiežnaj palityki.
Nieabchodnaść pryniaćcia zakona Zhurtavańnie biełarusaŭ śvietu «Baćkaŭščyna» ahučvała daŭno: z 2001 hoda hetaje pytańnie było asnoŭnym u paradku dnia pracy źjezdaŭ biełarusaŭ śvietu, što sklikajucca «Baćkaŭščynaj» kožnyja čatyry hady.
Bolš za toje, na źjezdach nie tolki prymalisia zvaroty da ŭrada z zaklikam pryniać adpaviedny zakon, delehaty vychodzili z kankretnymi prapanovami, datyčnymi źmiestu zakona.
Praktyčna hatovy zakonaprajekt byŭ nakiravany Zhurtavańniem va Urad pa vynikach i Čaćviortaha (2005 h.), i Piataha (2009 h.) źjezdaŭ biełarusaŭ śvietu.
Hety dakumient byŭ składzieny z ulikam mierkavańnia dyjaspary, a taksama padobnaha zakanadaŭstva inšych unitarnych krainaŭ. «Baćkaŭščyna» prapanavała nazvać zakonaprajekt «Ab biełarusach zamiežža».
U kancy 2009 hoda pry Nacyjanalnym centry zakanadaŭstva i pravavych daśledavańniaŭ Respubliki Biełaruś znoŭ była stvoranaja pracoŭnaja hrupa pa raspracoŭcy zakonaprajekta, u jaje ŭvajšli pradstaŭniki dziaržaŭnych ustanoŭ Biełarusi i hramadskich arhanizacyj, što pracujuć ź biełaruskaj dyjasparaj, u tym liku i «Baćkaŭščyny».
U vyniku byŭ raspracavany zakonaprajekt, jaki ŭsio ž atrymaŭ nazvu «Ab biełarusach zamiežža». Niekalki hod zakonaprajekt vandravaŭ pa roznych dziaržaŭnych ustanovach dziela ŭzhadnieńniaŭ, i, adpaviedna, źmianiaŭsia jaho źmiest.
Apošnim časam nad kančatkovym varyjantam zakonaprajekta pierad padačaj u pałatu pradstaŭnikoŭ pracavała Ministerstva zamiežnych spraŭ Biełarusi, bolš za toje, u vypadku pryniaćcia zakonu asnoŭnaja nahruzka pa jaho vykanańni budzie kłaścisia mienavita na hetuju dziaržaŭnuju ŭstanovu.
U suviazi z hetym Zhurtavańnie «Baćkaŭščyna» źviarnułasia da načalnika hałoŭnaha ŭpraŭleńnia šmatbakovaj dypłamatyi Ministerstva zamiežnych spraŭ Respubliki Biełaruś Juryja Ambrazieviča pa kamientar adnosna zakonaprajekta i jaho dalejšaha losu.
Adkazy Juryja Ambrazieviča čytać pa hetaj spasyłcy
