Hienadź Sielaźnioŭ |
A. Łukašenka ŭ terminovym paradku vyklikaŭ da siabie z Maskvy rasiejskaha deputata Hienadzia Sielaźniova. Pra toje, što rasiejski android terminova spatrebiŭsia Łukašenku, havoryć toj fakt, što hetaja sustreča ŭ planach biełaruskaha kiraŭnika nia značyłasia.
Nahodaŭ dla terminovaj sustrečy było bolš čym dastatkova. Navat miarkujučy pa ścisłym paviedamleńni presavaj słužby prezydenta, možna zrazumieć, jakija pytańni j prablemy tryvožać A.Łukašenku najpierš.
Tak, havorka išła pra mahčymaści vydačy Biełarusi rasiejskaha ŭradavaha stabilizacyjnaha kredytu. Łukašenka zapeŭniŭ, što «ŭ ekanomicy krainy nia budzie dapuščana nijakich abvałaŭ», što «sytuacyja ŭ respublicy narmalovaja, idzie aktyŭny pošuk šlachoŭ źnižeńnia enerhavydatkaŭ u ekanomicy». Adnak, niahledziačy na toje, što apora robicca na ŭłasnyja siły, dadatkovyja srodki na apłatu enerharesursaŭ jamu ŭsio ž patrebnyja.
U hetaj suviazi havorka išła pra sytuacyju ŭ Rasiei: pra pryznačeńnie novaha ŭradu j premjer‑ministra. Vielmi chvalavali Łukašenku j terminy praviadzieńnia pasiedžańnia Vyšejšaj dziaržrady sajuznaj dziaržavy.
Ale Sielaźnioŭ byŭ vymušany nahadać Łukašenku, što terminy mažliva vyznačyć tolki paśla papiaredniaha abmierkavańnia dvuma prezydentami pieraliku tem, jakija mohuć uvajści ŭ paviestku dnia VDR.
Biez sumnievaŭ, Łukašenka j Sielaźnioŭ abmierkavali biahučy palityčny momant u Rasiei, u śviatle budučych parlamenckich vybaraŭ, a taksama šerah inšych tem.
Akazvajecca, tema rasiejskaha ŭradavaha kredytu žyvaja j šče jak. Heta značyć tolki toje, što prodaž dziarždoli ŭ statutnym fondzie Vełkoma, hetak ža jak i zapusk finansavaj schiemy «investar M. fon Kieler z vartaj davieru reputacyjaj» nia nadta dapamahli sacyjalna‑aryjentavanaj biełaruskaj ekanomicy.