Mitrapalit Tadevuš Kandrusievič zaklikaŭ katalickich śviataroŭ malicca za aryštavanaha dziaržbiaśpiekaj ksiandza Uładzisłava Łazara, ale pieraściaroh ad paśpiešlivych dziejańniaŭ. Hetuju zajavu jon zrabiŭ na sustrečy sa śviatarami śviataroŭ i kansekravanymi asobami Minska-Mahiloŭskaj archidyjacezii ŭ Vilejcy.
«Na sustrečy z katalickim duchavienstvam arcypastyr nahadaŭ pra situacyju z aryštam ksiandza Uładzisłava Łazara, zaachvočvajučy śviataroŭ, zakońnikaŭ i zakońnic malicca ŭ hetaj situacyi, a taksama nie pradprymać nijakich dziejańniaŭ biez ŭzhadnieńnia ź biskupam», — paviedamlaje aficyjny sajt kaścioła ŭ Biełarusi Catholic.by.
«Hetaja sprava vyklikała šyroki rezanans u Biełarusi i śviecie i, na žal, nie spryjała adzinstvu. Śledstva praciahvajecca, i siońnia ciažka rabić zdahadki, čym zavieršycca sprava. Treba malicca», — cytuje sajt arcybiskupa Kandrusieviča.
Arcybiskup «paprasiŭ śviataroŭ ab dałučeńni hetaj spravy da malitvaŭ viernikaŭ, a taksama pa abstavinach, paśla liturhii, asabliva ŭ niadzielu, malicca ŭ chramach ab ščaślivym vyrašeńni hetaj prablemy».
Taki zvarot arcybiskupa možna rascanić jak prajavu zakłapočanaści. Niadzielnaja malitva na liturhii ŭklučaje samyja važnyja pa značnaści spravy. Raniej kaścioł staviŭsia da spravy z maksimalnaj aściarožnaściu. Nie było nijakich vykazvańniaŭ ani acenak z boku ijerarchaŭ. Heta vyklikała krytyku z boku aktyŭnych śviataroŭ i śvieckich: aryšt Łazara mnohija ŭspryniali najpierš jak sprobu zastrašyć katalikoŭ i stvaryć atmaśfieru niedavieru da ich.
Tolki praź niekalki miesiacaŭ paśla zatrymańnia stała viadoma, što KDB abvinavačvaje ksiandza Łazara ŭ zdradzie dziaržavie. Hetuju infarmacyju atrymała Kanfierencyja katalickich biskupaŭ.
«Atrymanaja infarmacyja zvodzicca da nastupnaha — ksiondz U.Łazar sapraŭdy zatrymany orhanami KDB i znachodzicca ŭ SIZA KDB u Minsku. Jon abvinavačvajecca ŭ parušeńni p. 1 art. 356 Kryminalnaha kodeksa Biełarusi. Jaho kryminalnaja adkaznaść vyznačajecca p. 6 art.16 „Saŭdzieł u złačynstvie“ Kryminalnaha kodeksa, — paviedamlaŭ kaścioł. — Ksiandzu Łazaru stavicca ŭ vinu pieradača hrošaj i materyjalnych kaštoŭnaściaŭ čałavieku, jaki abvinavačvajecca ŭ špijanažy na karyść inšaj dziaržavy».
«My niadaŭna zatrymali adnaho z zdradnikaŭ, jaki słužyŭ u śpiecsłužbach i jaki praz pradstaŭnikoŭ katalickaj carkvy byŭ źviazany z zamiežnymi dziaržavami», — adznačyŭ Łukašenka žurnalistam.
Na pastyrskaj sustrečy ŭ Vilejcy mitrapalit Tadevuš Kandrusievič taksama paviedamiŭ, što ahulnabiełaruskaja sustreča katalickich śviataroŭ, prymierkavanaja da zaviaršeńnia Hoda viery, projdzie 15 listapada ŭ minskaj parafii Śviatych Symona i Aleny (Čyrvony kaścioł).
Sajt Catholic.by piša, što mitrapalit «padziakavaŭ prysutnym za addanuju pracu, zaklikaŭ da jednaści i paprasiŭ być uvažlivymi, kab nie być uciahnutymi ŭ supraćpraŭnyja dziejańni. „Niachaj słovy psalma „iak dobra žyć bratam u jednaści“ dapamohuć nam budavać jednaść pamiž nami, bo ŭ hetym naša siła“, — pažadaŭ Mitrapalit.
