«Sukienka» — pieršaje biełaruskaje fieministyčnaje dakumientalnaje videa, nad jakim pracavali adnačasova niekalki aŭtarak. Jaho prezientacyja adbyłasia 8 sakavika 2013 hoda na multyłejble «Piaršak» moładzievaha časopisa 34mag.net.
Faktyčna «Sukienka» — videa-daśledvańnie praciahłaściu 50 chvilinaŭ, sieryja intervju, pryśviečanych temie vybaru žyćciovych stratehij žančynami ŭ Biełarusi. Praca nad videa adbyvałasia ŭ miežach prajekta «Raźvićcio hiendernaj adčuvalnaści ŭ Biełarusi», jaki ažyćciaŭlaŭsia ŭ 2011-2012.
Roznyja hieraini — dziaŭčynka ź dziciačaha domu, maci-hierainia, biźnies-ledzi, hramadskaja aktyvistka, raspaviadajuć pra žyćcio, mužčyn, dziaciej, los i kachańnie. Klučavy kantekst dla abjadnańnia roznych historyj — tema (mahčymaści) vybaru. Jaki vybar vyznačajecca jak «pravilny», jakija isnujuć scenary narmalizacyi žanočaha vybaru, i jakimi resursami dla «samastojnaha» vyznačeńnia svajoj žyćciovaj stratehii vałodajuć žančyny?
«Heta videa-ese pra toje, jak sacyjalnaje “adzieńnie” dapamahaje nam vydavać realnaje za žadanaje, pieratvarajučysia to ŭ karnavalny kaścium, to va ŭcichamirvalnuju kašulu», — kažuć aŭtarki «Sukienki».
Paralelna zdymkam stužki pravodziłasia daśledvańnie temy śviata 8-ha sakavika, Mižnarodnaha žanočaha dnia. Na dumku stvaralnic prajekta, śviata, jakoje napačatku svajho isnavańnia mieła jaskravy palityčny charaktar, ź ciaham času zhubiła jaho, i nabyła patryjarchalna-seksiscki charaktar. Z vynikami daśledvańnia, jakoje pravodziłasia na materyle publikacyj u hazietach, možna aznajomicca ŭ knizie «Hiendierny likbiez» pad redaktarstvam Aleny Minčeni i Volhi Sasunkievič.
Na staroncy prezientacyi možna spampavać videa dakumientalnaha praektu «Sukienka» z anhielskimi subtytrami.
Aŭtarskaja hrupa videa: Iryna Novik, Ksienija Pažydajeva, Natalla Aksianievič, Taćciana Siacko, Viera Pachaj, Taćciana Bułka, Kaciaryna Bujko, Darja Sapranieckaja, Natalija Hołava, Alaksandra Ihnatovič.
Kiraŭnicy prajekta: Natalija Hołava, Alaksandra Ihnatovič
