Paraŭnańnie koštaŭ na sałodkija padarunki ŭ Minsku.
Tańniej za ŭsio nabyvać sałodkija padarunki i mandaryny na Kamaroŭskim rynku.
Ale treba pamiatać, što sadavina i harodnina na adkrytych rynkach mohuć padmarožvacca.
Da Novaha Hoda zastałasia para dzion, i heta samy «haračy» čas — ludzi vystojvajuć hadziny ŭ hihanckich čerhach, kab nabyć padarunki i prysmaki. Hust na padarunki i prysmaki ŭ kožnaha svoj, ale niaźmiennymi ŭ navahodniuju noč zastajucca šampanskaje, mandaryny i sałodkija padarunki dzieciam. Karespandent «NN» prajšoŭsia pa bujnych sietkach supiermarkietaŭ, a taksama zazirnuŭ na Kamaroŭski rynak, kab vyśvietlić, dzie vyhadna kuplać hetyja śviatočnyja atrybuty.
Sałodkija padarunki
Dzieci piščać ad radaści, znachodziačy pad jalinkaj pryhožuju skryniu z asarci z cukierak. Siońnia ŭ kramach možna vybrać padarunak na luby hust i hamaniec. Asnoŭnaje adroźnieńnie — vaha, skład padarunku, cana i, zrazumieła, vybar.
Najtańniejšyja sałodkija padarunki — u firmovych kramach «Kamunarki». Vybar padarunkaŭ u ich niebłahi (vahoj ad 300 hramaŭ da 2,5 kiłahrama), ale ŭsie jany adnoj marki. Astatnija kandytarskija kramy handlujuć cukierkami na vahu — vidać, kankurencyja z «Kamunarkaj» biessensoŭnaja.
Šyroki vybar sałodkich padarunkaŭ čakaje taksama ŭ «Susiedziach» — tam jość i «Kamunarka», i «Spartak», a taksama sałodkija siurpryzy ź inšych krain. Košty, zrazumieła, vyšejšyja. «Jeŭraopt» i «Rubloŭski» ŭ hetym hodzie, vidać, nie rabili akcenty na sałodkija dziciačyja padarunki, tamu i šerah najmieńniaŭ u hetym kramach nie vialiki. Samy tanny padarunak možna kupić u «Jeŭraoacie» — tam 500 h cukieračnaha padarunka pa akcyi kaštujuć 39 900. Samy darahi byŭ zaŭvažany na Kamaroŭcy — 2,5 kiłahrama za 217 tysiačaŭ.
Šampanskaje
Jaki ž novy hod biez šampanskaha? Siońnia na palicach kramaŭ staić i tannaje hazavanaje vino za 20 tysiačaŭ, i elitnyja francuzskija napoi z Šampani za
Samy tanny brut raźlivu Minskaha zavoda šampanskich vin možna znajści ŭ «Jeŭraopcie» pa 32 900 za butelku. U kramach hetaj handlovaj sietcy viny roznaj stupieni ihrystaści i jakaści buduć kaštavać ad 23 900 da 90 800 rubloŭ. U «Susiedziach» toj ža brut krychu daražejšy — 33 900. Ceny na ihrystyja tam viny spyniajucca na 68 tysiačach, ale jość i šampanskaje za miljon rubloŭ. Samy darahi brut ad MZŠV byŭ u «Rubloŭskim» — tam jon kaštavaŭ až 41 740. Ale ŭ «Rubloŭskim» dobry vybar zamiežnaha šampanskaha. A voś na Kamaroŭskim rynku šampanskaje nie pradajecca.
Mandaryny
Sałodkich i duchmianych mandarynaŭ nie byvaje zašmat. Na Kamaroŭskim rynku ceny na «sałodkija soniejki» pačynajucca ad 12 500, a siaredni košt — niedzie 13,5 tysiačaŭ.
U «Jeŭraopcie» mandaryny pradajucca za 14 900. U inšych handlovych sietkach mandaryny značna daražejšyja: u «Susiedziach» jany kaštujuć ad 17 520 da 18 210, a ŭ «Rubloŭskim» — 18 220.
