U kabinietach kiraŭnictva RVUP "Zavod hazietnaj papiery" ŭ Škłoŭskim rajonie 18 śniežnia prajšli ahlady i kanfiskacyja dakumientaŭ supracoŭnikami ŭpraŭleńnia pa raskryćci ciažkich ekanamičnych złačynstvaŭ UUS Mahiloŭskaha abłvykankama.
Jak paviedamili BiełaPAN va ŭpraŭleńni Śledčaha kamiteta pa Mahiloŭskaj vobłaści, supracoŭniki milicyi pravodzili hetyja mierapryjemstvy ŭ miežach pravierki infarmacyi ab mahčymych niezakonnych dziejańniach kiraŭnictva pradpryjemstva. Ahlady i kanfiskacyja pačalisia 17 i doŭžylisia 18 śniežnia.
Pakul nijakaj kryminalnaj spravy nie raspačata, paviedamiŭ pradstaŭnik pravaachoŭnaha viedamstva.
***
Uvod u ekspłuatacyju škłoŭskaha zavoda hazietnaj papiery ŭ 2008 hodzie najpierš byŭ skiravany na vyrašeńnie stratehičnaj zadačy — impartazamiaščeńnia hazietnaj papiery i nasyčeńnia ŭnutranaha rynku hetaj pradukcyjaj. Pradpryjemstva vykarystoŭvaje technałohii i abstalavańnie viadučych jeŭrapiejskich vytvorcaŭ dla vyrabu vysakajakasnaj hazietnaj papiery, piłamateryjałaŭ, pahanažnych vyrabaŭ, klejenaha brusa, a taksama karkasna-ščytavych damoŭ i damoŭ z klejenaha brusa.
U lipieni 2011 hoda Alaksandr Łukašenka daručyŭ da kanca 2013 hoda stvaryć na bazie zavoda hazietnaj papiery ŭ Škłovie vytvorčaść papiery — asnovy dla dekaratyŭnych ablicovačnych materyjałaŭ, jakija vykarystoŭvajucca pry vypusku vyrabaŭ z DSP i MDF. Pry jaje vyrabie mahčyma vykarystańnie inšych vidaŭ syraviny, jakija nie padychodziać dla vytvorčaści hazietnaj papiery. Łukašenka zapatrabavaŭ nadać asabliva pilnuju ŭvahu pytańniu vybaru pastaŭščyka abstalavańnia dla novaha pradpryjemstva, kab nie pamylicca ŭ jakaści. Pry hetym jon taksama zapatrabavaŭ nie zaciahvać z terminami budaŭnictva, kab užo da kanca 2013 hoda pradpryjemstva pačało pracu. Stvareńnie takoj vytvorčaści aceńvałasia prykładna ŭ 70 młn. jeŭra.
