U Biełarusi budzie ŭviedzienaja kryminalnaja adkaznaść za prypiski. Pry hetym nievykanańnie planavych pakazčykaŭ taksama ličycca złačynstvam.
Prezydent na naradzie z kiraŭnikami Mahiloŭskaj vobłaści j Škłoŭskaha rajonu nazvaŭ prypiski «haniebnaj źjavaj». Pravierki KDK vyjavili, što prypisvajuć pa ŭsioj krainie ŭ asabliva bujnych pamierach. U Škłoŭskim rajonie z pravieranych siami haspadarak prypiski vyjaŭleny ŭ šaści va ŭsich sferach — u zbožžy, bulbie, małace, karmach, pahałoŭi žyvioły, pa ŭvodzie ŭ ekspluatacyju žyłych damoŭ. Pamiery prypisanaha taksama ŭražvajuć — jany składajuć tysiačy ton, hałoŭ, metraŭ.
«Treba navučyć ludziej pracavać jak śled», — hrozić prezydent. Ciapier pravierki buduć pravodzicca stała. «Sovietskaja Biełoruśsija» paśpieła nazvać hety peryjad «pačatkam novaha etapu dziaržaŭnaha budaŭnictva ŭ Biełarusi». (Pra heta ŭ feljetonie Lolika Uškina — staronka 24.)
Koła nibyta zamknułasia: spačatku kryminalnaja adkaznaść była ŭviedziena za niezabieśpiačeńnie prahnoznych pakazčykaŭ, ciapier — za prypiski.
Ciapier čynoŭnik rajonnaha ŭzroŭniu atrymaŭ «vybar»: być pakaranym za niezabieśpiačeńnie prahnoznych pakazčykaŭ, ci za prypiski. Apošniaje mienš strašna. Za prypiski časam z pasady nie zdymajuć, bo jany vyhadnyja ŭsioj hierarchii čynoŭnikaŭ. Prypiska da prypiski z kožnaha rajonu — voś i prahnoznyja pakazčyki vykanany.
Tamu ničoha nia źmienicca — jak prypisvali, tak i buduć prypisvać. Pry zachavańni dziejučaj systemy prypisak nia vykaraniš.
❏
U 7 pravieranych haspadarkach Škłoŭščyny byli vyjaŭlenyja prypiski 3,5 tys. tonaŭ zbožža. Takim čynam, možna mierkavać, što ŭ maštabie krainy (usiaho dziejničaje 2 325 sielhaspradpryjemstvaŭ) prypiski skłali 1 160 tys. t. Razmach!
