Ілюстрацыйнае фота «Наша Ніва»
38-гадовага жыхара Мар'інай Горкі, які «звязаўся з ботам Буданава», абвінавачваюць паводле двух крымінальных артыкулаў, піша «Медыязона».
Мужчыну абвінавачваюць у падрыхтоўцы да злачынства (частка 1 артыкула 13 КК) і падрыхтоўцы да ўдзелу ва ўзброеным фармаванні на тэрыторыі замежнай дзяржавы (частка 1 артыкула 361-3 КК). Беларуса ўзялі пад варту.
Сілавікі зрабілі справаздачу аб затрыманні беларуса 28 сакавіка. На міліцэйскім відэа мужчына кажа, што «падтрымлівае Украіну ў іх барацьбе супраць рускіх». Мужчына кажа, што ў 2023 годзе спрабаваў нелегальна перайсці мяжу Беларусі і Украіны, каб уступіць у УСУ «забіваць рускіх».
У 2024 годзе ён напісаў у «бот Буданава» — гаворка ідзе пра Кірыла Буданава, начальніка Галоўнага ўпраўлення разведкі Украіны — каб зноў перайсці мяжу. Паводле яго, яму прапанавалі «зладзіць тэракт» — падарваць адміністрацыйны будынак або чыгуначнае палатно.
«Так як выбуховага прыстасавання ў мяне няма, ён сказаў, што зробіць закладку і назаве месца. Карацей, я сц***кануў, выдаліў телеграм і той акаўнт. Аднак спробы перасекчы мяжу я не пакінуў», — кажа мужчына.
Пасля гэтага ён «звязаўся з польскай амбасадай» і прапаноўваў ім даць калідор, каб ён трапіў ва Украіну. Яму адмовілі, неўзабаве ён быў затрыманы.
У відэа паказана перапіска з ботам. У паведамленнях з «бота Буданава» выкарыстоўваецца беларуская літара «ў», якой няма ва ўкраінскім алфавіце.
«В Беларуси» ў паведамленнях напісана як «в Бїлорусїї», хаця правільнай формай будзе «у Білорусі».
