Ганна Сялук. Фота: Скрыншот АНТ
Прэзентацыя песні адбылася на прыёме Лукашэнкі ў Стары Новы год. Музыку на словы Ганны Сялук напісаў кампазітар Алег Шаўмараў. А выканаць даручылі Аляксандры Мелех. Даволі прадказальны выбар з улікам таго, што дзяўчына раней спявала «Ах, Аляксандр!». Дарэчы, менавіта з гэтага прызнання ў каханні найбольш вядомаму ў Беларусі Аляксандру і пачалася паспяховая кар’ера спявачкі: з шараговай настаўніцы ў мінскім цэнтры дадатковай адукацыі дзяцей і моладзі «Светач» ды бэк-вакалісткі яна ператварылася ў зорку праўладных мерапрыемстваў.
Аляксандра Мелех. Фота з інстаграму спявачкі
Таму не дзіўна, што і цяпер Аляксандра напісала на сваёй старонцы ў інстаграме: «Я не стамлюся дзякаваць аўтарам песні за гэты 100% хіт».
Поўную версію песні яшчэ нельга знайсці ў інтэрнэце, аднак вы можаце ацаніць мастацкі ўзровень некаторых радкоў:
Тое, што робяць у Беларусі, тое не ламаецца!
Зроблена ў Беларусі, сэрцам, рукамі, ведамі —
Каб было добра людзям, каб ва ўсім свеце ведалі.
Зроблена ў Беларусі, шчыра, прыгожа, радасна,
Зроблена ў Беларусі — значыць са знакам якасці.
Трэба адзначыць, што Ганна Сялук з’яўляецца адной з самых прадуктыўных аўтарак песень у Беларусі. Напрыклад, напярэдадні Новага года выйшлі кліпы на яе песні для той жа Аляксандры Мелех і беларускай «Веркі Сярдзючкі» Зінаіды Фурор (амплуа, якое нагадвае вобраз украінца Андрэя Данілкі, абраў артыст Маладзёжнага тэатра эстрады Яўген Ермалковіч).
Чытайце таксама:
«Не крыўдзіце яго проста без прычыны». Нявестка Лукашэнкі прысвяціла яму новую песню
