Ілюстрацыйнае фота Michal Dyjuk / AP
Зараз у Беларусі функцыянуюць шэсць прыватных устаноў адукацыі, заявіў міністр адукацыі Андрэй Іванец, піша «Спутнік».
Ён нагадаў, што ў 2022 годзе ў закон «Аб ліцэнзаванні» ўнеслі папраўкі, якія вызначылі парадак атрымання ліцэнзій на адукацыйную дзейнасць установамі адукацыі.
Паводле яго слоў, для прыватных школ такія ж патрабаванні, як і для дзяржаўных, а іх дзейнасць павінна строга адпавядаць заканадаўству.
У верасні 2022 года беларускія ўлады звярнулі ўвагу на працу прыватных адукацыйных устаноў, пасля чаго адбылося закрыццё шэрагу школ (усяго іх было больш за 30).
У заканадаўстве былі ўведзеныя новыя формы ліцэнзавання для ўстаноў дашкольнай, агульнай сярэдняй і спецыяльнай адукацыі. Школы і дзіцячыя сады прыватнай формы ўласнасці павінны былі выканаць патрабаванні, якія тычацца наяўнасці неабходнай вучэбнай дакументацыі, мэблі, інвентару, санэпідрэжыму і гэтак далей.
У чэрвені 2023 года першы намеснік міністра адукацыі Аляксандр Бахановіч адзначаў, што ў краіне працуюць пяць прыватных школ, якія змаглі атрымаць дазволы. Пры гэтым ён падкрэсліў, што ліцэнзаванне прайшлі ўсе дзяржаўныя школы.
Чытайце таксама:
Чыноўнікі Гомельшчыны забаранілі моладзі «пажыць для сябе»
Школьнікам выдаюць пластыкавыя карты для праезду. Ці будзе штраф, калі імі не карыстацца
У беларускіх школах увядуць новы падручнік па гісторыі. Але «перапісвання не будзе»
