Ілюстрацыйнае фота
Ягор з Мінска разам з дзяўчынай зайшоў у кафэ і папрасіў для яе дзіцячае меню: «Дзяўчына мініяцюрная, есць маленькія порцыі. Але ў кафэ выдаваць дзіцячае меню нам не хацелі. Хочацца даведацца, наколькі гэта правамерна», — запытаўся малады чалавек у Onliner.by.
Ягор не хавае, што ягоная размова з адміністратаркай кафэ дайшла да канфлікту. Адміністратарка тлумачыла, што ва ўстанове прыносяць меню толькі гасцям з дзецьмі, гэта рэгламентуецца ўнутраным распараджэннем. Ягор жа настойваў, каб яму прынеслі і паказалі гэтае распараджэнне, але ён нічога не атрымаў.
«Потым я дастаў тэлефон і сказаў: хачу, каб адміністратарка мне на камеру сказала, што яны не выдаюць дзіцячае меню з-за нейкага свайго ўнутранага распараджэння. Пасля гэтых маіх слоў яна не тое, каб шпурнула мне гэта дзіцячае меню — аддала з пагардай і сышла. Нам з дзяўчынай заставацца ў кавярні не хацелася, мы сышлі». На развітанне хлопец пакінуў запіс у кнізе скаргаў.
Пасля гэтага Ягор з дзяўчынай пайшлі ў іншае кафэ і ўбачылі ў меню дзіцячы капучына. «Я спытаў у работніц, ці прададуць мне дзіцячы капучына, калі я ўжо не дзіця. Яны адказалі, што, вядома, прададуць і ім не важна, ці ёсць са мной дзіця», — распавёў малады чалавек.
Версія кафэ
Onliner.by папрасіў работнікаў кафэ пракаментаваць сітуацыю. У вуснай размове сказалі, што дзіцячае меню — гэта спецпрапанова, якая дзейнічае на пэўных умовах. А менавіта — яго прыносяць за столікі гасцей, дзе ёсць дзеці. Таксама да спецпрапановы адносіцца абедзеннае меню (яно дзейнічае толькі ў пэўныя гадзіны), акцыя «2 піцы па цане 1» (дзейнічае толькі па аўторках).
У пісьмовым адказе ад кафэ змяшчалася наступная інфармацыя: «Дзіцячае меню госцю далі. Магчыма, у момант першапачатковага звароту госця дзіцячага меню не было ў наяўнасці ў афіцыянта, бо нас у рэстаране на той момант было шмат маленькіх гасцей альбо былі яшчэ нейкія складанасці з прадастаўленнем яго. Дзіцячае меню пры паўторным звароце было аддадзена, але госць сам адмовіўся рабіць па ім заказ, што таксама ён указаў у сваёй заўвазе».
Дзіцячае меню толькі для дзяцей? Адказвае юрыст
Спецыяліст па правах спажыўцоў, юрыст Іван Райкевіч кажа, што кафэ было абавязана даць дзіцячае меню хоць бы для азнаямлення, паколькі вытворца (прадавец, пастаўшчык, прадстаўнік, выканаўца) абавязаны своечасова даваць спажыўцу неабходную дакладную інфармацыю аб прапанаваных таварах (працы, паслугах). Гэта прапісана ў законе аб абароне правоў спажыўцоў, а менавіта ў пп. 1.2 п. 1 арт. 5.
Тым не менш у кафэ ёсць магчымасць асобна ўрэгуляваць пытанне аб рэалізацыі страў з дзіцячага меню. Напрыклад, аформіць іх як акцыйныя стравы. Але, кажа юрыст, акцыі трэба афармляць, і, калі гэта зрабіць няправільна, пытанні могуць з'явіцца ў органаў кантролю.
Чытайце таксама:
Што прапануюць сталічныя рэстараны на Новы год і колькі гэта каштуе
«Смачны» бізнэс. Якія кафэ і рэстараны цяпер прадаюцца
Расіянкі прыехалі адпачыць у Мінск — ад цэн у кафэ здарылася істэрыка
