Урсула фон дэр Ляен і Уладзімір Зяленскі ў Кіеве. 4 лістапада 2023. Efrem Lukatsky, AP Photo / File
Кіраўніца Еўракамісіі Урсула фон дэр Ляен заявіла, што еўрапейскія чыноўнікі рэкамендавалі Еўрасаюзу пачаць фармальныя перамовы аб уступленні з Украінай і Малдовай пры выкананні некалькіх умоў. У дакладзе ЕС таксама ўтрымліваецца рэкамендацыя даць Грузіі статус кандыдата на ўступленне ў блок, піша Бі-бі-сі.
Канчаткова пытанне аб сяброўстве трох дзяржаў мае вырашыцца на саміце ЕС у снежні.
Па словах фон дэр Ляен, перамовы аб сяброўстве Украіны пачнуцца, як толькі Кіеў выканае дадатковыя ўмовы ў дачыненні да барацьбы з карупцыяй, законаў у дачыненні лабізму і правоў нацыянальных меншасцяў.
У суботу кіраўніца Еўракамісіі Урсула фон дэр Ляен пахваліла Кіеў за выкананне «больш чым на 90%» сямі кантрольных паказчыкаў рэформаў, устаноўленых Брусэлем.
«Я ўпэўненая, што вы зможаце дасягнуць сваёй амбіцыйнай мэты — гістарычнага рашэння аб адкрыцці працэсу перамоваў аб уступленні ў ЕС, якое мае быць прынятае ўжо сёлета», — сказала яна падчас візіту ў Кіеў.
Дыпламаты з краін ЕС, якія рашуча падтрымліваюць Кіеў, прызнаюць, што дэбаты ў снежні будуць жорсткімі — і згода на пачатак перамоваў можа быць абумоўленая далейшымі рэформамі.
«Відавочна, што дыскусія будзе гарачай і цяжкай — калі б гэта было не так, мы б ужо мелі кампраміснае рашэнне, — сказаў AFP адзін з высокапастаўленых еўрапейскіх дыпламатаў. — Я аптымістычна настроены на тое, што мы зможам яго прыняць. Гэта не канец шляху».
Агенцтва Bloomberg напярэдадні паведамляла, што заключэнне Еўракамісіі будзе станоўчым для Кіева, аднак у ім будзе ўтрымлівацца шэраг умоў. Іспанская El Pais пісала са спасылкай на праект дакумента, што пачатак дыялогу аб уступленні ўвязваецца з абаронай правоў моўных меншасцяў і больш актыўнай барацьбой з карупцыяй.
Украінскі прэзідэнт Уладзімір Зяленскі падаў заяўку на сяброўства ў ЕС адразу пасля пачатку расейскага ўварвання ў лютым 2022 года. Праз некалькі месяцаў, у чэрвені, Украіна атрымала статус кандыдата на ўступленне.