Некалькі буйных тэлеканалаў ЗША перапынілі трансляцыю выступу прэзідэнта ЗША Дональда Трампа з Белага дома, калі той пачаў рабіць бяздоказныя заявы аб мінулых прэзідэнцкіх выбарах, паведамляе The Verge. Выступ Трампа перапынілі тэлеканалы MSNBC, ABC, CBS, CNBC, NBC, а таксама выданне USA Today, піша Meduza.io.
У сваёй прамове Дональд Трамп, які балатаваўся на новы тэрмін ад Рэспубліканскай партыі, абвінаваціў прадстаўнікоў Дэмакратычнай партыі ў махлярстве і спробе скрасці выбары.
Таксама ён заявіў, што перамагае на выбарах, калі лічыць толькі «законныя галасы», хоць на самай справе падлік галасоў працягваецца ў некалькіх ключавых штатах.
Хутчэй за ўсіх дзейнічаў вядучы MSNBC Браян Уільямс, які перапыніў Трампа ў сярэдзіне выступу. Ён сказаў у эфіры: «Мы зноў знаходзімся ў незвычайным становішчы: мы не толькі перарываем прэзідэнта ЗША, але і папраўляем яго».
На CNBC вядучы Шэпард Сміт, перарываючы Трампа, заявіў, што «тое, што кажа прэзідэнт Злучаных Штатаў, у значнай ступені, абсалютна няправільна».
Тэлеканалы CNN і Fox News паказалі выступ Трампа цалкам, пры гэтым журналіст CNN Дэніэл Дэйл назваў гэтую прамову «самай несумленнай» з 2016 года.
