У часе прэс-туру дэлегацыя з расейскіх рэгіянальных СМІ наведала ня толькі звыклыя «Беларуськалій» і калгас-маяк у Снове, але і сумеснае беларуска-нямецкае прадпрыемства «Хенкель Баўтэхнік» у Заслаўі. Што ж там такое немцы выкупілі?
Сумеснае беларуска-нямецкае прадпрыемства «Хенкель Баутэхнік», якое ўваходзіць у групу кампаніяў Henkel, было створанае ў 2004 годзе. У верасьні 2006 году ў Заслаў, што пад Менскам, СП распачало ўласную вытворчасьць будаўнічых сумесяў на пабудаваным дзеля гэтых мэтаў заводзе. Інвэстыцыі ў вытворчасьць па стане на 2007 год склалі 6,5 млн эўра.
У 2008-2009 праект «Завод будаўнічых сумесяў Ceresit» атрымае яшчэ 2 млн. эўра. Праектная магутнасьць заводу ў Заслаўі складае 100 тыс.т., на такі паказчык прадпрыемства плянуе выйсьці да 2010 году.
Пачынаў «Хенкель Баўтэхнік» з шасьці базавых прадуктаў, на сёньня ён прапануе ўвесь спэктар будаўнічых сумесяў Henkel пад гандлёвымі маркамі Ceresit і Thomsit.
Гораду новае прадпрыемства прынесла 150 дадатковых працоўных месцаў а таксама 250 млн рублёў на рэканструкцыю мясцовых дарог.
Пляны кампаніі ў Беларусі не абмяжоўваюцца наладжваньнем уласнай вытворчасьці ў Заслаўі. Два гады таму канцэрн абвесьціў пра пляны інвэставаць у разьвіцьцё вытворчасьці на базе баранавіцкага «Бархіму» $40 млн. Асноўнай задачай беларуска-нямецкай кампаніі зьяўляецца насычэньне ўнутранага рынку будаўнічых матэрыялаў. Тым ня менш, пачынаючы зь мінулага году прадпрыемства наладзіла пастаўкі прадукцыі ў Малдову і Ўкраіну.
Агулам жа міжнародная група кампаніяў Henkel, штаб-кватэра ў Дусэльдорфе (Нямеччына), мае прадстаўніцтвы больш чым у 125 краінах сьвету.
