Трагедыя адбылася 5 жніўня, але толькі цяпер з'явіліся доказы. Выданне туркменскай праваабарончай арганізацыі «Хроніка Туркменістана» паведамляе, што на адкрыццё стадыёна «Капетдаг» у Ашхабадзе народ загналі на стадыён а 5-й раніцы для масоўкі.
Урачыстае адкрыццё павінна было адбыцца а 7-й раніцы. Аднак прэзідэнт Туркменістана Гурбангулы Бердымухамедаў з'явіўся на «Капетдагу» ажно ў 11:45. Амаль сем гадзін людзі ва ўзросце ад чатырох да 70 гадоў стаялі пад пякучым сонцам у ачапленні. За гадзіны чакання прытомнасць страцілі каля 50 чалавек, 14 былі шпіталізаваныя яшчэ да пачатку мерапрыемства, трое з іх памерлі ў той жа дзень, сцвярджае ананімная крыніца. Сярод загінулых — адно дзіця.
Чаму прэзідэнт Туркменістана спазніўся? Яму проста захацелася да адкрыцця стадыёна агледзець іншыя аб'екты.
Мала таго, да гадзіны дня ўсе вуліцы ў радыусе чатырох кіламетраў былі перакрытыя, у тым ліку і да цэнтраў неадкладнай дапамогі. Да зняцця ачаплення ні людзі, ні медперсанал не маглі патрапіць у бальніцы.
Гэта не рэдкасць у Туркменістане. «Летась прэзідэнт прыязджаў у горад Мары з візітам. Дзяцей пашыхтавалі ўздоўж дарогі, а ў іх урэзаўся аўтамабіль прэзідэнцкай аховы. У выніку загінулі дзеці. Мы пра гэта казалі нават на адным са сходаў у ААН па правах чалавека, і туркменскія ўлады гэта прызналі. Сказалі нават, што расследаванне завядуць», — распавёў выданню «Настоящее Время» рэдактар сайта туркменскай праваабарончай арганізацыі Фарыд Тухбатулін.
