У Мінску 18 снежня ў прысутнасці міністра абароны Беларусі Юрыя Жадобіна, дырэктара Федэральнай службы па ваенна-тэхнічным супрацоўніцтве РФ Аляксандра Фаміна, пасла Расіі ў Беларусі Аляксандра Сурыкава падпісаны кантракт паміж ААТ «Карпарацыя «Іркут» і Мінабароны Беларусі на пастаўку ў 2015 годзе чатырох вучэбна-баявых самалётаў Як-130.
Пра гэта паведамілі ў
прэс-службе абароннага ведамства.
Двухмесны вучэбна-баявы самалёт Як-130, распрацаваны АКБ імя А. С. Якаўлева, прызначаны для асноўнай і павышанай падрыхтоўкі лётчыкаў франтавой авіяцыі. Самалёт вызначаецца выдатнай манеўранасцю і сучасным бартавым радыёэлектронным абсталяваннем, характэрным для найноўшых баявых самалётаў, а таксама высокай надзейнасцю і працяглым рэсурсам.
Як-130 з’яўляецца адзіным у свеце вучэбным самалётам з аэрадынамічнай кампаноўкай і лётна-тэхнічнымі характарыстыкамі дагукавога палёту, аналагічнымі сучаснаму рэактыўнаму знішчальніку.
Самалёт здольны несці да 3.000 кг баявой нагрузкі (кіраванае і некіраванае ракетнае і бомбавае ўзбраенне, гарматы і г.д.) на дзевяці вонкавых вузлах падвескі.
ААТ «Карпарацыя «Іркут» выконвае кантракт на пастаўку 65 Як-130 для ВПС Расіі.
Беларусь стала першай дзяржавай — удзельніцай СНД, якая закупляе УБС Як-130.
Нагадаем, 21 верасня гэтага года, расказваючы журналістам пра вынікі сустрэчы з прэзідэнтам Расіі Уладзімірам Пуціным, беларускі прэзідэнт Аляксандр Лукашэнка адзначыў, што Расія дасць Беларусі новыя сучасныя самалёты для аховы мяжы. «У нас сумесная СПА. Мы па ваенна-паветраных сілах абмеркавалі шмат пытанняў. Я папрасіў падтрымкі і яе атрымаў. Найбліжэйшым часам мы атрымаем сучасныя самалёты, каб несці дзяжурства на мяжы», — цытавала Лукашэнку дзяржаўнае агенцтва БелТА. Ён растлумачыў, што ў ваенных самалётаў, якія мае Беларусь, заканчваецца рэсурс: «У ваенны час мы іх падняць можам, але ў мірны час патрэбныя новыя нармальныя самалёты. Мы пра гэта дамовіліся. Мы сваю мяжу разам з прэзідэнтам Расіі дамовіліся забяспечваць належным чынам».
Было меркаванне, што гаворка ідзе пра 18 знішчальнікаў Су-30, якія стаялі на ўзбраенні індыйскай арміі і цяпер знаходзяцца на 558-м авіярамонтным заводзе ў Баранавічах. Гэта авіятэхніка належыць ААТ «Іркут». Аднак затым эксперты звярнулі ўвагу на тое, што гаворка ідзе пра самалёты для аховы мяжы, для нясення дзяжурства на мяжы. Для гэтага падыходзяць, напрыклад, вучэбна-баявыяЯк-130, але ніяк не цяжкія знішчальнікі.
Дарэчы, у лістападзе 2007 года Іркуцкі авіяцыйны завод наведаў тагачасны кіраўнік урада Беларусі Сяргей Сідорскі. У лістападзе 2009 года там пабывала дэлегацыя ВПС і войскаў СПА узброеных сіл Беларусі на чале з адным з намеснікаў камандуючага. Яны ацэньвалі магчымасць размяшчэння замовы на пастаўку Як-130 для беларускай арміі. А 3 жніўня 2010 года Ігар Азаронак, які займаў тады пасаду камандуючага ВПС і войскамі СПА, на прэс-канферэнцыі абвясціў, што беларускія ваенныя рэальна прапрацоўваюць пытанне аб набыцці Як-130.
БелаПАН
Хочаш падзяліцца важнай інфармацыяй ананімна і канфідэнцыйна?
Пішыце рэдактару «Нашай Нівы» ў ТГ
