10 studzienia
Dvornikaŭ prymusili
Namieśnik staršyni AHP Ihar Šynkaryk padaŭ zajavu ŭ Partyzanskuju rajonnuju vybarčuju kamisiju i prakuraturu Partyzanskaha rajonu. Jon śćviardžaje, što jahony kankurent pa Traktarazavodzkaj akruzie №54 Miensku, daradca staršyni Kamitetu dziaržaŭnaha kantrolu Michaił Matusievič parušaje vybarčaje zakanadaŭstva. Pavodle infarmacyi I.Šynkaryka kiraŭnictva ŽES‑64 dało zahad svaim supracoŭnikam raspaŭsiudžvać ahitacyjnyja materyjały M.Matusieviča, a ŭlotki inšych kandydataŭ zryvać. Sp.Šynkaryk maje sumnievy nakont sapraŭdnaj kolkaści ahitacyjnych ulotak svajho kankurenta.
11 studzienia
Siarhiej Sałaš
U Barysavie supracoŭnikami milicyi byŭ zatrymany siabra Partyi BNF Siarhiej Sałaš, jaki źjaŭlaŭsia davieranaju asobaju kandydata ŭ deputaty ŭ Mienskaha abłsavietu deputataŭ Źmitra Babickaha. Suprać Sałaša była ŭžytaja pravakacyja: kala jahonaha domu da jaho padbieh nieznajomy mužčyna i pačaŭ pravakavać na bojku. Chutka padjechała milicejskaja mašyna j milicyjanty zabrali abodvuch.
Pieratrusy na Homielščynie
Aktyvista demakratyčnych siłaŭ Alaksandra Karatčenku pratrymali ŭ Čyhunačnym RUUS Homiela siem hadzin. Padčas nadhladu mašyny milicyjanty znajšli 6 000 ulotak ad imia rehijanalnaha kaardynatara ruchu «Za svabodu» Uładzimira Kacory, u jakich, na mierkavańnie pravaachoŭnych orhanaŭ, źmieščanyja «antykanstytucyjnyja vykazvańni». Paśla sankcyi prakurora byŭ praviedzieny pieratrus u kvatery zatrymanaha, dzie byŭ kanfiskavany ćviordy dysk kamputara.
U toj ža dzień pry ŭjeździe ŭ Žłobin supracoŭniki DAI zatrymali aŭtamabil sakratara rajonnaj arhanizacyi PKB Valerja Rybčanki, u jakim taksama znachodzilisia kandydaty ŭ deputaty rajonnaha Savietu siabry PKB Viktar Balankoŭ i Valancin Jaŭzrezaŭ i dziejny deputat rajsavietu siabar AHP Marat Afanaśjeŭ.
Milicyjanty nie pradstavili nijakich abvinavačvańniaŭ, zaznačyŭšy, što mohuć pratrymać mužčynaŭ 3 hadziny.
Milicyjanty Bieraściejščyny
Lider Abjadnanych demakratyčnych siłaŭ Alaksandar Milinkievič byŭ zatrymany supracoŭnikami milicyi paśla čarhovaj sustrečy z vybarcami Biarozy. Milicyjanty nie pradjavili nijakich abvinavačvańniaŭ. Jany zapatrabavali pierapisać dadzienyja ludziej, jakija razam ź Milinkievičam znachodzilisia ŭ jahonaj mašynie, spasłaŭšysia na zahad načalstva.
Paźniej, na ŭjeździe ŭ Bieraście, biez usialakich tłumačeńniaŭ, mašyna Milinkieviča znoŭ była zatrymanaja supracoŭnikami DAI. Pad kanvojem mašyna palityka była nakiravanaja ŭ adzin z RUUSaŭ Bieraścia. Praz hadzinu biez prad`iaŭleńnia abvinavačvańniaŭ Milinkieviča vyzvalili.
U Bieraści administracyja Doma kultury suviazi, niahledziačy na dazvoł uładaŭ, admoviłasia pradastavić dla sustrečy aktavuju zalu, arhumentujučy heta tym, što ŭ zali adbyvałasia daterminovaje hałasavańnie. Sustreča Milinkieviča ź bieraściejcami adbyłasia ŭ faje Domu kultury.
12 studzienia
Ščukin iznoŭ
Viadomaha pravaabaroncuValerja Ščukina zatrymali supracoŭniki milicyi na vybarčym učastku №52 Pieršamajskaha rajonu. Tam sp.Ščukin pracavaŭ ŭ jakaści žurnalista i mieŭ pry sabie paśviedčańnie hazety «Narodnaja vola». Pryčyny zatrvymańnia milicyjanty nie patłumačyli.
Labiedźka źniaŭ svaju kandydaturu z vybaraŭ
Lider Abjadnanaj hramadzianskaj partyi Anatol Labiedźka paviedamiŭ pra zdymańnie svajoj kandydatury z vybaraŭ u harsaviet. U admysłovaj zajavie palityk kanstatavaŭ, što z 202 siabroŭ AHP, jakija apaviaścili pra svoj namier udzielničać u palityčnaj kampanii «miascovyja vybary», tolki 60 pieraadoleli barjer rehistracyi. Z 537 aktyvistaŭ AHP, vysunutych u Miensku ŭ vybarčyja ŭčastkovyja kamisii, ułady nie ŭklučyli ŭ skład kamisij nivodnaha čałavieka.
Sud nad aktyvistami
Pavodle rašeńnia sudu Maskoŭskaha rajonu Bieraścia, udzielnik kampanii «Za Svabodu» Andrej Šarenda byŭ apraŭdany, a jahony paplečnik Dzianis Turčaniak pakarany štrafam u pamiery 15 500 rubloŭ.
Milicyjanty, jakija zatrymlivali 11 studzienia sp. Šarendu ŭ centry Bieraścia, nia zdoleli davieści ŭ sudzie pryčynu zatrymańnia sp.Šarendy. Dzianisa Turčaniaka spačatku vinavacili ŭ kiravańni skradzienym aŭto. Paźniej hetyja abvinavačvańni byli źniatyja, ale sp. Turčaniaka pakarali štrafam u pamiery 0,5 b.v. za nibyta łajanku i niepadparadkavańnie milicyjantam.
Pinskija paplečniki
Sustreča Alaksandra Milinkieviča z vybarcami Pinsku adbyłasia ŭ adsutnaść abodvuch demakratyčnych kandydataŭ, davieranaj asobaj jakich źjaŭlajecca Milinkievič. Alaksandar Vasiljeŭ i Alaksandar Ramanovič pavodle abvinavačvańniaŭ u nibyta drobnym chulihanstvie, trapili ŭ miascovy izalatar časovaha ŭtrymańnia. Vasiljeŭ 9 studzienia atrymaŭ 7 sutak, a Ramanovič, napiaredadni pryjezdu Milinkieviča, – 5 sutak aryštu.
U Horadni izalavali
U Leninskim rajsudzie Horadni pakarany aryštam na piać sutak Andruś Famin — davieranaja asoba kandydata ŭ deputaty abłsavietu Valerja Kisiala z Partyi BNF.
4‑dzionnym aryštam u Kastryčnickim rajonnym sudzie pakarali Maksima Hubareviča — davieranuju asobu kandydata ŭ deputaty Siarhieja Antusieviča z Partyi BNF.
Abodvuch apazycyjaneraŭ abvinavacili ŭ drobnym chulihanstvie. Śviedkami na sudzie byli milicyjanty.
Za skarhu na milicyju
Aršanski sud asudziŭ moładzievaha aktyvista Sieržuka Huminskaha na troje sutak aryštu. Niekalki dzion tamu jon byŭ žorstka źbity supracoŭnikami milicyi za pryncypovaje karystańnie biełaruskaj movaj. Małady čałaviek źviarnuŭsia sa skarhaju ŭ prakuraturu na dziejańni milicyi. U čaćvier jon znoŭku byŭ vyklikany ŭ milicyju, dzie na jaho skłali pratakoł pa art. 156 i 166 KoAP – «chulihanstva» i «niepadparadkavajeńnie patrabavańniam supracoŭnikaŭ milicyi». U znak pratestu S.Huminski abviaściŭ haładoŭku.
5 sutak u Pružanach
Siabar AHP Uładzimier Radzivončyk pakarany sudom Pružanskaha rajonu na 5 sutak administratyŭnaha aryštu. Jaho źvinavacili ŭ «niecenzurnaj łajancy ŭ hramadzkim miescy na adras niejkaj asoby». Paśla zatrymańnia ŭ pastarunak vyklikali «chutkuju» – u Radzivončyka pahoršyŭsia stan zdaroŭja. Sudździa Alena Łahoda pryznała śviedčańni milicyjantaŭ słušnymi i pakarała aktyvista apazycyjnaj partyi piaciu sutkami aryštu.
Aleś Kalita źbity
Lider Moładzi BNF Aleś Kalita asudžany sudom Savieckaha rajonu Miensku na 7 sutak. U časie zatrymańnia jon byŭ źbity specnazaŭcami. Alesia advozili ŭ 9‑ty kliničny špital Miensku, dzie medyki zafiksavali paškodžańni.
Sud nad moładzievaj aktyvistkaj Nastaśsiaj Aleksandrovič adkładzieny da 1 lutaha. Na praces u Frunzienskim sudzie Mienska, u jakaści śviedkaŭ abvinavačvańnia pryjšli supracoŭniki milicyi, jakija nie mieli dačynieńnia da zatrymańnia aktyvistki. Tamu sud adkładzieny da 1 lutaha. Dziaŭčyna była zatrymanaja ŭviečary 12 studzienia. Supracoŭniki milicyi ŭ cyvilnym spačatku pierarezali telefonny drot, a paśla ŭvarvalisia ŭ kvateru. Dziaŭčynu abvinavacili ŭ parušeńni art. 156 KaAP – «drobnaje chulihanstva». Aleś Kalita byŭ zatrymany ŭ adździaleńni milicyi, kudy pryjechaŭ vyśvietlić los N.Aleksandrovič.
Na Kazulina cisnuć
Advakat Alakskandra Kazulina Źmicier Haračka paviedamiŭ, što na palitviaźnia akazvajecca cisk z boku niekatorych supracoŭnikaŭ administracyi kalonii. Na Kalady A.Kazulinu, adzinamu z usich asudžanych, nie dazvolili pajści ŭ carkvu, jakaja znachodzicca na terytoryi kalonii. Kazulin adznačaje, što, kali napadki na jaho nie spyniacca, jon maje namier paskardzicca na dziejańni kiraŭnictva kałonii ŭ Departament vykanańnia pakarańniaŭ.
Pa słovach advakata, stan zdaroŭja A.Kazulina zdavalniajučy: u jaho dahetul nie prachodziać acioki noh, balać nyrki i straŭnik, z pryčyny čaho palitviazień zmušany padoŭhu zastavacca ŭ paścieli.
13 studzienia
U Horadni aryštavanyja Stanisłaŭ Pačobut i Jaŭhien Skrabutan
Sud Leninskaha rajonu Horadni prysudziŭ da 7 sutak aryštu muzyku Stanisłava Pačobuta i da 3 sutak aryštu – studenta Jaŭhiena Skrabutana.
S.Pačobuta zatrymali supracoŭniki AMONu. Spačatku jany kazali, što aktyvist nibyta padobny na čałavieka, jaki skraŭ aŭtamabil. Adnak u Leninskim RUUS Harodni ŭ dačynieńni Pačobuta byŭ składzieny pratakoł pa art. 156 KaAP – «drobnaje chulihanstva».
Ja.Skrabatun byŭ zatrymany adrazu paśla prybyćcia ŭ Horadniu z Polščy, dzie jon navučajecca pa prahramie Kastusia Kalinoŭskaha. Jaho taksama abvinavacili ŭ parušeńni art.156 KaAP.
14 studzienia
AMON žorstka źbiŭ
La budynku Mienskaha abłvykankamu adbyŭsia pikiet suprać udziełu ŭ miascovych vybarach. Niekalhi hramadzkich aktyvistaŭ kala 10 chvilinaŭ trymali raściažku «Vas padmanuli». Paśla hetaha ich zatrymali supracoŭniki AMONu. Niepaŭnaletniuju Naściu Šaškovu, pavodle śviedčańniaŭ udzielnikaŭ akcyi, u časie zatrymańnia milicyjanty bili nahami. Jaje dastavili ŭ Mienskuju haradzkuju bolnicu №1.
15 studzienia
Asudzili za «łajanku»
Sudździa Partyzanskaha rajonu Miensku Mikałaj Trubnikaŭ vynies rašeńnie ab troch sutkach aryštu ŭ dačynieńni siabra AHP Andreja Dźmitryjeva. Jaho abvinavacili ŭ parušeńni art.156 KaAP – nibyta jon niecenzurna vykazvaŭsia i čaplaŭsia da minakoŭ.
Na sudzie prysutničaŭ estonski parlamentar Silvier Mejkar «dla aznajamleńnia z sudovaj systemaj Biełarusi». A.Dźmitryjeŭ 12 studzienia byŭ schopleny na vulicy supracoŭnikami ŭ cyvilnym, jakija dastavili jaho ŭ Partyzanski RUUS Mienska. Vychodnyja Dźmitryjeŭ pravioŭ u specpryjomniku‑raźmierkavalniku na Akreścina.
