Źniščanaja rasijskaja technika pad Aŭdziejeŭkaj. Fota: Airborne1126 / Telegram
Zdymak z drona, na jakim bačnyja 17 adzinak źniščanaj (abo paškodžanaj i kinutaj) rasijskaj techniki, apublikavała ŭ svaim kanale ŭ telehramie 25-ja asobnaja Siečasłaŭskaja pavietrana-desantnaja bryhada VSU.
Jak paviedamlaje Instytut vyvučeńnia vajny (ISW) 30 sakavika Uzbrojenyja siły Ukrainy, padobna, adbili maštabnuju miechanizavanuju ataku kolkaściu da bataljona BTR i tankaŭ u rajonie nasielenaha punkta Tonieńkaje na zachad ad Aŭdziejeŭki Danieckaj vobłaści.
ISW adznačaje, što heta była pieršaja miechanizavanaja ataka rasijskaj armii na ŭzroŭni bataljona ŭ vakolicach Aŭdziejeŭki za apošnija paŭhoda.
Vajenny analityk Jan Maćviejeŭ źviarnuŭ uvahu na vializny pracent tankaŭ, jakija skłali try čverci ŭsioj vajennaj techniki. Pavodle jaho słoŭ, zvyčajna vykarystoŭvajuć 1-2 tanki na čale kałony, dalej iduć BMP i BTR jak transpart dla piachoty. A tut u nastup byli nakiravany minimum 36 tankaŭ i 12 BMP.
Paviedamlajecca, što ŭkrainskija siły padčas šturmu źniščyli 12 rasijskich tankaŭ i vosiem BMP, a łabavaja ataka nie zmahła prarvać ukrainskuju liniju abarony.
Adbić ataku atrymałasia dziakujučy zahadzia ŭstalavanym minam i kambinacyi artyleryjskaha ahniu z udarami FPV-dronami.
Rasijski vajenkar Juryj Kacianok pryčynu značnych strat bačyć u niepiśmiennym kamandavańni:
«Biada, kali hałoŭnym stymułam źjaŭlajecca mara pra hienieralskaje zvańnie, a ŭsio astatniaje, u tym liku źbieražeńnie ludziej, adychodzić na zadni płan. Ni na adnoj vajnie nielha minnyja pali raźminiravać padraździaleńniami».
ISW adznačaje, što heta pieršaje paviedamleńnie ab pryciahnieńni padraździaleńniaŭ 90-j tankavaj dyvizii da šturmaŭ paśla zachopu Aŭdziejeŭki, jakija razam ź inšymi rasijskimi padraździaleńniami i spałučeńniami, vierahodna, ujaŭlajuć značnym apieratyŭnym reziervam. Ich vykarystańnie moža śviedčyć pra namier rasijskaha kamandavańnia praciahvać i aktyvizavać namahańni nastupać na zachad ad Aŭdziejeŭki.
Ź inšaha boku, pravał ataki moža śviedčyć, što padraździaleńni apieratyŭnaha reziervu Rasii ŭ rajonie Aŭdziejeŭki mohuć być zanadta dehradavanymi abo pa inšych pryčynach niazdolnymi ŭznačalić dalejšaje prasoŭvańnie ŭ karotkaterminovaj pierśpiektyvie.
Jak adznačaje Forbes, toje, što ŭkraincy zmahli pieramahčy takija bujnyja i dobra ŭzbrojenyja rasijskija siły, śviedčyć, što niahledziačy na niedachop asnoŭnych bojeprypasaŭ ukrainskija bryhady pa-raniejšamu zdolnyja arhanizavać žorstkuju abaronu — časta z vykarystańniem kambinacyi min, artyleryi, supraćtankavych rakiet i FPV-dronaŭ.
Čytajcie jašče:
«16 tysiač biezzvarotnych strat». Aŭdziejeŭka vačyma rasijskich vajenkaraŭ
Zialenski: Ukrainskim vojskam udałosia strymać rasijski nastup
