Fota: Taylor Weidman/LightRocket via Getty Images
Surovyja ŭmovy ŭ Manholii nazyvajuć dzud. Jon nadychodzić, kali letniaja zasucha źmianiajecca mocnymi śniehapadami i ekstremalnymi marazami. Tempieratura pavietra moža apuskacca da -30°C abo i nižej, piša CNN.
Vysokaje śniežnaje pokryva i toŭsty płast lodu pakryvajuć pašy, pazbaŭlajučy žyviołu dostupu da ježy.
U Manholii kala 300 tysiač čałaviek zajmajucca tradycyjnaj kačavoj žyviołahadoŭlaj: ich dziejnaść zaležyć ad bujnoj rahataj žyvioły, koz i koniej. Siemji žyviołahadoŭcaŭ vandrujuć pa šyrokich łuhach krainy, kab znajści novyja pašy dla vypasu žyvioły. U letnija miesiacy jany vyroščvajuć korm dla žyvioł na zimu.
Dzudy zdarajucca ŭ Manholii ŭsio čaściej, tamu pašy nie paśpiavajuć adnavicca ŭ pierapynkach pamiž ekstremalnymi ŭmovami nadvorja, a pastuchi — zrabić patrebnyja zapasy.
«Ludzi, jakija całkam zaležać ad svajoj žyvioły, usiaho za niekalki miesiacaŭ stali žabrakami. Niekatoryja ź ich ciapier nie mohuć prakarmić siabie abo abahreć svaje damy», — kaža Alaksandr Mateu, rehijanalny dyrektar MKČK u Azijacka-Cichaakijanskim rehijonie.
Pa dadzienych MKČK, ź listapada 2023 hoda prynamsi 2250 siemjaŭ žyviołahadoŭcaŭ stracili bolš za 70% svajoj žyvioły. Bolš za 7000 siemjaŭ nie majuć dastatkovaha dostupu da prakormu.
Dzud pabiŭ try čverci terytoryi krainy, ale čakajecca, što ŭmovy pahoršacca.
«Ciapier viasna, ale zima ŭ Manholii zaciahvajecca, na ziamli ŭsio jašče lažyć śnieh, a bydła ŭsio jašče hinie», — adznačaje Mateu.
U minułym miesiacy manholski ŭrad abviaściŭ stan pavyšanaj hatoŭnaści, jakoje praciahniecca da 15 maja.
«Navat vysokaha ŭzroŭniu hatoŭnaści, jaki byŭ u Manholii ŭ hetym hodzie i ŭ papiarednija hady, niedastatkova, kab spravicca z ekstremalnymi ŭmovami. My zrabili vialikuju padrychtoŭku, i maštaby ŭsio jašče zaśpieli nas źnianacku», — tłumačyć rehijanalny dyrektar MKČK.
Pavodle dadzienych Suśvietnaj arhanizacyi achovy zdaroŭja, ciapierašni ŭzrovień śniežnaha pokryva byŭ samym vysokim za 49 hadoŭ i achapiŭ 90% terytoryi krainy.
«Hetyja dzudy cykličnyja, i jany zdarajucca ŭsio čaściej. Ich było ŭžo šeść za apošnija 10 hadoŭ. Hety, biezumoŭna, najhoršy», — skazaŭ Mateu.
Dadzienyja prahramy raźvićcia AAN (PRAAN) śviedčać, Manholija źjaŭlajecca adnoj z krain, najbolš paciarpiełych ad klimatyčnaha kryzisu. Siaredniaja tempieratura pavietra tam za apošnija 70 hadoŭ vyrasła na 2,1°C.
Čytajcie taksama:
Čaho chočuć jeŭrapiejskija fiermiery?
U biełaruskaha fiermiera za daŭhi pa alimientach aryštavali statak aviečak
