Mjanma. Fota: Wikimedia Commons
1 lutaha 2021 hoda ŭ Mjanmie adbyŭsia dziaržaŭny pieravarot. Vajskoŭcy ŭziali pad vartu prezidenta krainy Vina Mjina, dziarždaradcu Aun San Su Čžy i inšych lidaraŭ kiroŭnaj partyi «Nacyjanalnaja liha za demakratyju». Kamandujučy ŭzbrojenymi siłami hienierał Min Aunh Chłajn staŭ časovym prezidentam.
Dziaržaŭny pieravarot pierarvaŭ dziesiacihadovy praces pierachodu Mjanmy da demakratyi i viarnuŭ krainu ŭ status izhoja. A ŭ samoj krainie raspačałasia novaja hramadzianskaja vajna. Vajskoŭcam supraćstajać paŭstancy na čale z Uradam nacyjanalnaj jednaści.
U navahodnim zvarocie časovy kiraŭnik urada Mjanmy Duva Łašy Ła (Duwa Lashi La) zajaviŭ, što kaniec chunty ŭ krainie blizki:
«My bačym biesprecedentnaje masavaje deziercirstva i zdaču ŭ pałon sałdat vajennaha savieta (chunty — «NN»). Hledziačy na heta, možna skazać, što kaniec vajennaha savieta blizki»,
— cytuje słovy Duva Łašy Ła Radio Free Asia.
Situacyja ŭ Mjanmie na 1 studzienia 2024 hoda. Krynica: @ThomasVLinge / Ch (Twitter)
Nastup abjadnanych sił paŭstancaŭ (viadomych jak «Aljans troch bractvaŭ») pačaŭsia 27 kastryčnika 2023 hoda. Jon atrymaŭ nazvu «apieracyja 1027». Apazicyi ŭdałosia ŭziać pad kantrol šerah haradoŭ u paŭnočnym štacie Šan (Shan), niekalki klučavych pierachodaŭ na miažy z Kitajem, a taksam zachapić dziasiatki vajennych błokpastoŭ i łahieraŭ chunty. U vyniku padraździaleńni chunty byli faktyčna zabłakavanyja ad adpraŭki padmacavańnia.
Ab tym, što pośpiechi paŭstancaŭ sapraŭdy istotnyja, śviedčyć ich pryznańnie lidaram chunty Minam Aunham Chłajnam (Min Aung Hlaing) u svaim vystupleńni pry kancy listapada 2023 hoda.
Paŭstancy na fonie zachoplenaj zbroi i pałonnych. Skryn videa aljazeeraenglish / YouTube
Mižnarodnyja naziralniki adznačajuć rolu Kitaja jak klučavoha faktaru ŭ realizacyi «apieracyi 1027». Jany źviartajuć uvahu na toj fakt, što Kitaj zacikaŭleny ŭ likvidacyi centraŭ kibiermachlarstva, raźmieščanych na terytoryi krainy, achviarami jakich u pieršuju čarhu stanoviacca kitajcy.
Akramia hetaha, paŭstancy atrymali zbroju ad Abjadnanaj armii dziaržavy Va (samaabvieščanaj dziaržavy na terytoryi paŭnočnaha štata Šan). Analityki adznačajuć, što heta stała mahčyma taksama dziakujučy Kitaju, jaki asłabiŭ abmiežavańni adnosna samaabvieščanaj dziaržavy. Abjadnanaja armija dziaržavy Va naličvaje kala 30 tysiač čałaviek i ličycca samym mahutnym niedziaržaŭnym farmavańniem rehijona. Na ŭzbrajeńni ŭ jaje, akramia ŭsiaho inšaha, znachodziacca navat sistemy supraćpavietranaj abarony.
Pośpiechi ŭ štacie Šan nie adzinyja. Nazirajecca rost aktyŭnaha supracivu ŭ susiednim ź Indyjaj štacie Čyn (Chin). Jak paviedamlajecca, 29 śniežnia paśla bitvy la pasiołka Paletva ŭ hetym štacie zvyš 80 vajennasłužačych vojsk chunty ŭciakli ŭ indyjski štat Mizaram. Za apošnija dva miesiacy heta byŭ čaćviorty taki vypadak.
Prasoŭvańnie paŭstancaŭ nazirajecca i ŭ inšych štatach krainy — Kačyn (Kachin), Rakchajn (Rakhine), Kaja (Kayah), Sahajn (Sagaing).
Vajskoviec z našyŭkaj Armii vyzvaleńnie Ta-anh (TNLA), jakaja ŭvachodzić u Aljans troch bractvaŭ. Skryn videa aljazeeraenglish / YouTube
Jak pišuć karespandenty IndyStar, jakija pabyvali ŭ rajonie bajoŭ, paŭstancy vyjšli z džunhlaŭ i nabyli vopyt u haradskich bitvach, aktyŭna vykarystoŭvajuć bieśpiłotniki dla skidvańnia bombaŭ na pazicyi praciŭnika i ŭstanaŭlivajuć pastki z dapamohaj samarobnych vybuchovych prystasavańniaŭ.
Pa padlikach analitykaŭ, na pačatku 2024 hoda pad kantrolem paŭstancaŭ znachodziacca 33 harady pa ŭsioj krainie, za 15 haradoŭ idzie baraćba. Jašče try miesiacy nazad paŭstancy kantralavali tolki 8 haradoŭ. Pavodle acenak, tolki za apošni miesiac było advajavana zvyš 14 tysiač kvadratnych kiłamietraŭ terytoryi.
Takim čynam, na pačatku 2024 hoda kiroŭnaja chunta mieła kantrol tolki nad 40% terytoryi Mjanma.
Urad nacyjanalnaj jednaści śćviardžaje, što chunta zhubiła kantrol nad handlovymi šlachami z Kitajem i Indyjaj — asnoŭnymi krynicami dachodu va ŭmovach sankcyj, a jaje vojski vymušany abaraniacca adnačasova ŭ roznych rehijonach krainy.
Čytajcie jašče:
Rasija pryjšła na padtrymku chuncie Mjanmy
U Mjanmie padčas pratestaŭ za adzin dzień zabili bolš za 100 čałaviek. Siarod achviaraŭ jość dzieci
