17 listapada budzie adznačacca Mižnarodny dzień studenta — śviata, jakoje šyraka adznačajecca i ŭ Biełarusi. Studenckaja prykmieta kaža: z čaho b ni pačaŭsia Dzień studenta, usio roŭna skončycca, jak i letaś.
Samaje ciažkaje vyprabavańnie čakaje pieršakurśnikaŭ. Bo ŭ dadatak da studenckaha bileta, im jašče vypadaje adznačyć śviata sa studentami starejšych kursaŭ. Tamu prapanoŭvajem niekalki praviłaŭ dla pačatkoŭcaŭ, kab zastacca žyvym paśla Dnia studenta i 18 listapada z honaram zastacca svajoj VNU:
1. «Nie źmiešvaj» — hałoŭnaje praviła, jakoha varta prytrymlivacca ŭ śviatočny viečar. Nielha miašać harełku ź pivam, harełku z kavaj, vino ź pivam i navat piva ź pivam. Trymajcie siabie pad kantrolem i zastavajciesia čałaviekam. Stan studenta «u drovach» daŭno vyjšaŭ z mody.
2. «Zaŭtra na pary» — heta iścina, na jakuju nielha zabyvacca nikoli, što b nie zdaryłasia 17 listapada. Kali ŭžo zusim drenna na ranicu, to pastarajciesia jak maha sytniej paśniedać i vypić aśpirynu. I abaviazkova kupicie sabie miatnuju žujku. Vykładčyki, viadoma, usio zrazumiejuć, ale paškadujcie ich i nie dabivajcie pieraharam. Vam jašče hetym ludziam siesiju zdavać.
3. «Nie hublajcie hałavy na plačach». Kali nie chočacie pić — nie picie, heta vaša ułasnaja sprava. Kali chočacie pahulać, dyk hulajcie ad dušy. I z razumieńniem, što Dzień studenta nie apošni dzień u śviecie, budzie jašče šmat śviataŭ i buduć nahody paviesialicca. Budźcie saboj, kab u staraści ŭzhadvać studenckija časy z uśmieškaju, zamiest škadavańnia.
* * *
Adkul uziaŭsia Dzień studenta?
28 kastryčnika 1939 hoda, studenty i ich vykładčyki vyjšli na vulicy akupavanaj nacystami Prahi. Demanstracyja była pryśviečana hadavinie źjaŭleńnia čechasłavackaj dziaržavy. Nacysty razahnali demanstracyju, pry hetym byŭ zastreleny student miedycynskaha fakulteta Jan Opletał. Pachavańnie pierarasło ŭ akcyju pratestu. Dziesiatki studentaŭ byli aryštavany. 17 listapada nacysty šturmavali internaty Praskaha ŭniviersiteta. Dzieviać studentaŭ byli publična pakarany śmierciu, bolš za 1 200 adpraŭleny kancentracyjnyja łahiery, a ŭniviersitet byŭ začynieny.
17 listapada 1941 h. u Łondanie prajšła Mižnarodnaja sustreča studentaŭ, jakija zmahalisia suprać fašyzmu. Na hetaj sustrečy i było vyrašana adznačać hetuju datu jak Mižnarodny dzień studenta.
Praciah historyi studenckaha supracivu adbyŭsia 17 listapada 1973 h. u Hrecyi. U Techničnym univiersitecie ŭ Afinach studenty čaćviora sutak abaraniali na barykadach univiersitecki budynak, pratestujučy suprać dyktatury. Studentaŭ rasstralali tankami. Nieviadoma, kolki junakoŭ tady zahinuła, ale paŭstańnie stała pačatkam padzieńnia režymu «čornych pałkoŭnikaŭ».
17 listapada 1989 h. studenty Prahi padtrymali akcyju suprać kamunistyčnych uładaŭ, što stała pačatkam «aksamitnaj revalucyi». Siońnia hety dzień adznačajecca ŭ Českaj i Słavackaj respublikach taksama jak Dzień zmahańnia za volu i svabodu.
U Rasii Dzień studenta adznačajecca 25 studzienia — u hety dzień u 1755 h. rasijskaja impieratryca Jelizavieta padpisała ukaz ab adkryćci Maskoŭskaha univiersiteta.
