25 vieraśnia ŭ DAI Hrodna na dva hady pazbavili pravoŭ kiroŭcy i pryznačyli štraf u piać bazavych vieličyniaŭ (135 rubloŭ) Alaksandru Varabjovu, jaki trapiŭ u DTZ z aŭtazakam 11 žniŭnia kala Hrodzienskaj abłasnoj fiłarmonii. Vinavatymi ŭ DTZ pryznali taksama kiroŭcu aŭtazaka, ale raźbiralnictva ź im spynili «za małaznačnaściu», piša Hrodna.life.
Haradzieniec trapiŭ u avaryju z aŭtazakam kala Hrodzienskaj abłasnoj fiłarmonii 11 žniŭnia padčas mirnych pratestaŭ. Varabjoŭ, pavodle jaho słoŭ, nie ŭdzielničaŭ u akcyi, jon jechaŭ da mamy na vulicu Suvorava.
Paśla DTZ mužčyna vyjšaŭ ahledzieć paškodžańni aŭtamabila i paprasiŭ vyklikać DAI. Jaho žorstka zatrymaŭ AMAP. Pry zatrymańni Alaksandru złamali dva rebry. Jaho dastavili ŭ RAUS Kastryčnickaha rajona, paźniej jamu prysudzili 10 sutak administracyjnaha aryštu. 13 žniŭnia Alaksandra vypuścili.
Zhodna ź pieršym pratakołam, vinavatym u avaryi pryznali kiroŭcu aŭtazaka. Paźniej vinavatymi pryznali i jaho, i Alaksandra.
Alaksandr Varabjoŭ płanuje abskardzić rašeńnie DAI. Alaksandr — kaval-mastak, jaho majsternia znachodzicca za 50 kiłamietraŭ ad Hrodna. Pa svaim zaniatku jamu davodzicca časta karystacca aŭtamabilem.
