Advakatku Ludmiłu Kazak, jakaja abaraniaje siabra Kaardynacyjnaj rady Maryju Kaleśnikavu, pakarali štrafam u 675 rubloŭ za niepadparadkavańnie supracoŭnikam milicyi (23.4 KaAP). Paśla abviaščeńnia prysudu ŭ zali kryčali «Hańba!», piša «Svaboda».
U sud Ludmiłu Kazak nie pryvieźli, sudzili praz skajp. Sudździa — toj samy, što raniej sudziŭ žurnalistaŭ TUT.by i ahienctva BiełaPAN pa niadaŭniaj spravie žurnalistaŭ: Alaksandar Rudenka, namieśnik staršyni sudu.
Pavodle pratakołu, 24 vieraśnia ŭ 13:55 pa vulicy Kamunistyčnaja, 5 Ludmiła Kazak padčas svajho zatrymańnia akazała supraciŭ siaržantu milicyi «Ivanovu Ivanu Ivanaviču»: hetym razmachvała rukami, upirałasia nahami, sprabavała źbiehčy i nie chacieła iści ŭ aŭtamabil.
Ludmiła Kazak raspaviała, što jaje siłaj zatrymlivali troje ludziej u maskach, adzin ź jakich u formie AMAPu. Jany nie pradstaŭlalisia i nie patłumačyli pryčynu zatrymańnia. Paśla advakatku advieźli ŭ Centralny RUUS, adabrali telefon i skłali pratakoł za ŭdzieł u masavym mierapryjemstvie 30 žniŭnia.
U sud hety pratakoł nie pastupiŭ. Sudzili Ludmiłu Kazak za «niepadparadkavańnie supracoŭnikam milicyi». Pry zatrymańni ŭ sumcy advakatki byli materyjały pa spravie Maryi Kaleśnikavaj, jakija ŭtrymlivajuć advakackuju tajnu.
«Ja mocna spužałasia, bo nie zrazumieła, što adbyvałasia. Ja advakatka i viedaju, jak pavodzić siabie pry zatrymańni. Tut sa mnoj pastupili absalutna niezakonna», — raspaviała na sudzie Ludmiła Kazak.
Na sudzie vystupili śviedki, supracoŭniki milicyi RUUS Centralnaha rajonu, jakija zatrymlivali advakatku, «Alaksandar Alaksandravič Aleksandrovič» i «Ivanoŭ Ivan Ivanavič». Ich ankietnyja źviestki źmianili, bo, pavodle milicyjantaŭ, im i ich siemjam pastupajuć pahrozy. Abodva śviedki byli ŭ bałakłavach, vystupali na sudzie praz skajp-suviaź.
«Chto vam pahražaje? Ja vam pahražaju?» — spytała Ludmiła Kazak u śviedki.
«Učora pahražali», — adkazaŭ śviedka «Alaksandar Alaksandravič Aleksandrovič».
Śviedka «Ivan Ivanavič Ivanoŭ» nia ź pieršaha razu razumieŭ pytańni advakataŭ. Sudździa niekalki razoŭ prasiŭ advakataŭ farmulavać praściej.
«Ja nie paznaju hetaha čałavieka, jon mocna kartavić, i ja ź im nie sustrakałasia», — zajaviła Ludmiła Kazak.
Milicyjant niekalki razoŭ admaŭlaŭsia adkazvać na pytańni abvinavačanaj i jaje advakataŭ, spasyłajučysia na słužbovuju tajamnicu. Advakatka Ludmiły Kazak paprasiła pryciahnuć śviedku «Ivanova Ivana Ivanaviča» da administracyjnaj adkaznaści za admovu ad dačy pakazańniaŭ u sudzie. Sudździa Alaksandar Rudenka admoviŭ. Advakaty patrabavali spynić administracyjnuju spravu za adsutnaściu dokazaŭ.
«Advakaty padviarhajucca asabistym pahrozam, pieraśledam i aryštam. Zatrymańnie Ludmiły Kazak — heta cisk na jaje i jaje klijentku Maryju Kaleśnikavu. Heta sproba zapužać advakataŭ, ale my nie baimsia, my aburanyja i patrabujem heta spynić», — zajaviŭ advakat Viktar Mackievič.
Padtrymać Ludmiłu Kazak pryjšli kali 50 čałaviek, siarod jakich kalehi-advakaty i adnahrupniki.
Ludmiła Kazak — šmatdzietnaja maci, u jaje troje niepaŭnahadovych dziaciej. Advakatka ličyć, što jaje zatrymańnie źviazanaje ź jaje prafesijnaj dziejnaściu — abaronaj Maryi Kaleśnikavaj.
Ludmiła Kazak pierastała vychodzić na suviaź dniom 24 vieraśnia. Uviečary jaje abaroncy daviedalisia, što jana ŭ IČU na Akreścina, pryčyny zatrymańnia tam nazvać admovilisia.
Jak raskazali TUT.by advakaty Viktar Mackievič i Śviatłana Harbatok, 25 vieraśnia jany nie mahli trapić da klijentki bolš za try hadziny. Administracyja spačatku spasyłałasia na karantyn, potym — na «ŭnutranyja mierapryjemstvy» ŭ IČU. U vyniku puścili pa adnym.
Sa słovaŭ Ludmiły Kazak, troje mužčyn jaje schapili na vulicy Kamunistyčnaj, kali jana padychodziła da mašyny.
«Adzin supracoŭnik AMAP, astatnija nieviadoma chto, u maskach. Pryvieźli ŭ Centralnaje RUUS, razmaŭlaŭ supracoŭnik Vusik. Skłali pratakoły za ŭdzieł u niesankcyjanavanym masavym mierapryjemstvie i za niepadparadkavańnie supracoŭnikam milicyi. Nibyta 30 žniŭnia jana była na akcyi na praspekcie Pieramožcaŭ, choć na samoj spravie ŭ hety dzień u HC «Halilea» z dačkoj kuplali rečy da škoły. Śviedkami ŭ pratakołach paznačanyja «Ivanovy Ivany Ivanavičy» — asoby, čyje persanalnyja źviestki źmienienyja», — paviedamiŭ Viktar Mackievič.
Pavodle Ludmiły Kazak, supracoŭniki milicyi pavodzili siabie «napyšliva i pa-chamsku», nazyvali «damočka», kazali, što jana pavinna padparadkoŭvacca ich patrabavańniam. Całkam ihnaravali zajavy, što joj treba na sudovaje pasiedžańnie.
