Alaksandra Dzikan, žonka adnaho z zatrymanych top-menedžaraŭ IT-kampanii PandaDos Viktara Kuŭšynava, razam z synam pajechała va Ŭkrainu, bo atrymała papiaredžańnie ab mahčymym pieraśledzie. Detali pieraśledu muža i svajho pierajezdu ŭ Kijeŭ Alaksandra Dzikan raskazała «Svabodzie».
«Muž paprasiŭ, kab źjechała»
«Praz paŭtara tydnia paśla zatrymańnia, kali moj muž užo znachodziŭsia ŭ SIZA na Vaładarskaha, jon pieradaŭ mnie, kab ja źjaždžała, kab jamu było bolš spakojna. Bo jany ž cisnuć na ŭraźlivyja miescy, šantažujuć blizkimi i rodnymi. Aproč taho, ja jašče ličusia zasnavalnicaj niedziaržaŭnaj arhanizacyi, i, niahledziačy na toje, što ja tam užo nie pracuju hod, pad mianie taksama pačali «kapać», — raskazała Alaksandra Dzikan.
Užo znachodziačysia ŭ Kijevie, jana daviedałasia, što na dziaržaŭnaj televizii vyjšaŭ siužet pra jejny «ŭdzieł» u nibyta «zamiežnym finansavańni» žanočych pratestaŭ:
«PandaDos peŭny čas dapamahała, spansavała na biazvypłatnaj asnovie arhanizacyju «Centar prasoŭvańnia pravoŭ žančyn», jakuju ja zasnavała, ale na toj momant užo ŭ joj nie pracavała. Heta była standartnaja praca z fondami ŭ Biełarusi, i jany «raśśledavali», što praź mianie pieravodziać hrošy ŭ Biełaruś i finansujuć žanočyja pratesty. Tady mnie i skazali, što lepš vyjechać terminova. I my vyjechali z synam. Potym da mianie pryjechała mama, kab dapamahać».
Pavodle jaje, kampanija pieraličyła hetaj arhanizacyi kala troch tysiačaŭ dalaraŭ, ale jany praktyčna nie byli vykarystanyja. U siužecie ž na dziaržaŭnym telebačańni śćviardžałasia, što «ŭ 2018 hodzie Dziarždepartamient ZŠA sprabavaŭ pieraličyć na rachunak Centra abarony pravoŭ žančyn, jaki zarehistravany ŭ Minsku, amal 19 tysiač dołaraŭ».
Udzielnica akcyj salidarnaści ŭ Kijevie
Na adnu z akcyj pratestu kala biełaruskaj ambasady ŭ Kijevie Alaksandra pryjšła razam z synam i maci. U rukach jana trymała plakat z nadpisam: «SAVEPANDADOC. Vyratujcie «PandaDok». Moj muž u turmie praz vas — zabojcaŭ, tarakanaŭ i bandytaŭ. Trybunał vam usim!»
Abvinavačańni ŭ svoj adras jana nazyvaje biespadstaŭnymi, a suprać muža — palityčnaj zamovaj:
«Ja — heta taki łancužok, dadatkovy cisk na muža i na PandaDos. A siužet pra mianie pakazali, kab pramyć mazhi siłavikam, što pratesty apłočvajucca. Pieraśled supracoŭnikaŭ kampanii — heta palityčnaja zamova, bo jaje zasnavalniki vystupili z zajavaj ab padtrymcy siłavikoŭ, jakija admoviacca ad hvałtu i piarojduć na bok narodu. Heta takaja vendeta, pomsta, uziali ni ŭ čym nie vinavatych ludziej».
Spatkańnie z mužam pierad emihracyjaj
Alaksandra paviedamiła, što muža jana pabačyła ŭ Departamencie finansavych raśśledavańniaŭ praz try dni paśla jahonaha zatrymańnia:
«Ich tudy pryvieźli z Akreścina na dopyt, da pieravodu na Vaładarskaha. I voś tady ja jaho pabačyła. Jaho pryvieźli ŭ kajdankach, jak złačyncu, bandyta. Ja tady pieradała jamu pieradaču i abniała. Tady ja ŭžo razumieła, što, napeŭna, usio surjozna, ale jašče nie ŭśviedamlała, što jaho baču apošni raz na najbližejšuju perspektyvu».
Pavodle jaje, ciapier Viktaru Kuŭšynavu dapamahajuć jahonyja baćki, jakija zastalisia ŭ Miensku, i advakat:
«Dla mianie ciapier advakat — heta takaja nadziejnaja asoba, jakaja moža pieradać mužu maje słovy padtrymki i ad muža — nam. Jon, viadoma, nia moža šmat raskazać pra toje, jak prasoŭvajecca sprava, bo jany ŭsie padpisali papieru pra nievydavańnie. Ale jon moža mnie paviedamić pra samaadčuvańnie muža. Voś niadaŭna muž paprasiŭ, kab my źjeździli z synam na mora, pajechali tudy, dzie ciopła, kab adpačyć. Prasiŭ pieradać, kab my nie pieražyvali i što ŭ jaho ŭsio ŭ paradku, kali tak moža być u hetkich abstavinach. Ale zrazumieła, što ŭ spravie PandaDos pravavyja mechanizmy, pa sutnaści, nia dziejničajuć».
Razam z synam Alaksandra aranduje kvateru ŭ Kijevie, ale pakul nia vyrašyła, ci budzie źviartacca da ŭkrainskich uładaŭ pa lehalizacyju:
«Ja ŭ Kijevie paŭtara tydnia. Pakul nie sutykałasia ni ź jakimi prablemami i jašče nia viedaju, ci zajmacca lehalizacyjaj. Pakul ja nie planuju i nie chacieła b tut asieści i žyć. Spadziajusia, što my pieramožam i ja viarnusia ŭ volnuju krainu i sustrenusia z mužam».
