Spektakl «Biełaruskaja kamedyja», jaki pavinien byŭ pačacca ŭ horadzienskim dramatyčnym teatry ŭ 19:00 22 vieraśnia, admienieny «pa niezaležnych ad teatru abstavinach», piša «Svaboda».
Kala 18:20 na sustreču z artystami pryjechaŭ novy staršynia Horadzienskaha abłvykankamu Ŭładzimier Karanik. U teatar pryjšła načalnica ŭpraŭleńnia kultury abłvykankamu Alena Klimovič.
Dy dramteatru padjechali milicejskija mikraaŭtobusy, a taksama taniravanaja mikraaŭtobusy biez apaznavalnych znakaŭ. Pryjechali siłaviki, u tym liku načalnik Horadzienskaha AMAP Viktar Kraŭcevič.
Kala 19:20 Uładzimier Karanik vyjšaŭ z sustrečy z artystami. Haradziency, jakija pryjšli padtrymać teatrałaŭ, pravodzili jaho sa słovami «Ruki preč ad našych artystaŭ».
Stała viadoma, što dniami z horadzienskaha dramatyčnaha teatra zvolniłasia mastačka-pastanoŭščyca Volha Ščarbinskaja. U teatry zastalisia dva mastaki-pastanoŭščyki.
20 vieraśnia ŭ Horadni padčas akcyi pratestu zatrymali zasłužanaha artysta Biełarusi Siarhieja Kurylenku razam z žonkaj, artystkaj Valancinaj Charytonavaj. Kalehi, kali daviedalisia pra heta, ad emocyj nie zmahli dajhrać spektakl. U zali prysutničała nia bolš za dva dziasiatki hledačoŭ. Bolšaść vyrašyli zdać bilety paśla niaskončanaha spektakla, 4 čałavieki nie zdavali. Ciapier artysty musiać kampensavać košt usich viernutych kvitkoŭ.
Dyrektar Horadzienskaha abłasnoha dramatyčnaha teatru Ihar Hiedzič vyklikaŭ da siabie aktoraŭ, zadziejničanych u spektakli, i skazaŭ pisać tłumačalnuju zapisku, ci jany byli inicyjatarami zryvu spektakla, ci zakładnikami sytuacyi. Pryhraziŭ, što zvolnić tych, chto nie napiša.
Pavodle aktora dramteatru Vasila Miniča, artystku Jelizavietu Milincevič, jakaja ŭdzielničała ŭ niadzielnym spektakli, zvolnili paśla admovy pisać dyrektaru tłumačeńnie.
