A da hetaha abklejvali dźviery ŭlotkami z kałabarantami.
Fota ź instahrama Hanny Hubanavaj
Hanna Hubanava razam ź siamjoj žyvie ŭ słavutym «domie pad špilem» na skryžavańni vulic Kamunistyčnaj i Čyrvonaj u Minsku. Hety dom znachodzicca jakraz nasuprać Hienieralnaha štaba US Respubliki Biełaruś. Pra toje, što im davodzicca tryvać, raskazvaje sama Hanna Hubanava.
Takimi ŭlotkami abklejvajuć dźviery siamji Hanny i Arcioma
«Na bałkonie ŭ mianie visić bieł-čyrvona-bieły ściah. Raniej visieŭ čyrvony sarafan na biełaj praścinie, dyk jaho zdymali kručkom. Hety kručok u mianie zastaŭsia: parvaŭsia drot, i kručok zastaŭsia visieć na praścinie.
Kali ŭ nas visieŭ ściah, to a 3-j nočy my niejak pračnulisia ad hruku: źvierchu spuskaŭsia čałaviek, jaki zastaŭsia visieć nasuprać našaha akna. Muž padarvaŭsia, pytajecca: «Što ty robiš?» Jon kaža, što ramantuje lichtar, muž adpraviŭ ramantavać źnizu.
Uvieś minuły tydzień na dźviarach kvatery kleili pačvarnyja pasłańni z kadrami Druhoj suśvietnj vajny, dzie stajać ludzi pad bieł-čyrvona-biełymi ściaham. I pad hetymi fotkami źviartalisia da mianie i majho muža: «Hanna i Arciom, takoj budučyni vy žadajecie svaim dzieciam?» U minułuju piatnicu navat zhadali majo starejšaje dzicia. «Aleh užo darosły, ci takoj budučyni jon dla siabie choča?» Kali što, to Alehu šeść hadoŭ.
U subotu-niadzielu ŭ hetych ludziej, mabyć, byŭ vychadny, ale ŭ paniadziełak ranicaj dźviery razmalavali čyrvonaj i zialonaj farbami. Ja, viadoma ž, napisała zajavu ŭ milicyju. I hetuju noč na dźviarach znoŭ źjavilisia ŭlotki. Taki vandalizm nie spyniajecca. U mianie mastackaja adukacyja, ja skažu, što jany niapravilna abrali farbu i na ciomnych dźviarach jana była amal nie bačnaja i dobra admyłasia rastvaralnikam.
Što tyčycca susiedziaŭ, to jašče da ŭsich hetych padziej ja aktyŭna ź im kamunikavała, my chacieli ŭstalavać šłahbaum, rašali inšyja bytavyja pytańni. Ja viedaju kožnaha susieda pa imieni, pa imieni dziaciej, pa imieni sabački. I ja vielmi ździŭlusia, kali heta niechta ź ich.
My źbirajemsia ŭstalavać kamieru — heta pytańnie času. Ale dadzienyja pavodziny absalutna marhinalnyja. Kali abarona čyrvona-zialonaj simvoliki patrabuje takich dziejańniaŭ, to heta zvyčajny vandalizm. Mianie heta, kaniečnie, niervuje i trochu pałochaje, ale svoj ściah zdymać ja nie źbirajusia».
