28 žniŭnia, na nastupny dzień paśla masavaha zatrymańnia žurnalistaŭ u Minsku i Breście, «Biełaruskaja asacyjacyja žurnalistaŭ» nakiravała staršyni Śledčaha kamiteta zajavu ab raspačynańni kryminalnaj spravy pa fakcie pieraškody zakonnaj prafiesijnaj dziejnaści žurnalistaŭ.
U dakumiencie na 4 listach padrabiazna apisvalisia abstaviny spravy, a taksama abhruntavańnie nieabchodnaści raspačać kryminalnuju spravu pa prykmietach artykuła 198 Kryminalnaha kodeksa.
10 vieraśnia HA «Biełaruskaja asacyjacyja žurnalistaŭ» atrymała adkaz ad načalnika adździeła pa pracy sa zvarotami hramadzian centralnaha aparata SK:
«Paviedamlajem, što vykładzienaja ŭ zvarocie infarmacyja pa sutnaści nosić abstraktny charaktar, u suviazi z čym padstaŭ dla praviadzieńnia Śledčym kamitetam pravierak i pryniaćcia rašeńniaŭ u paradku, ustanoŭlenym Kryminalna-pracesualnym kodeksam Respubliki Biełaruś, nie majecca», — havorycca ŭ adkazie.
Nahadajem, 27 žniŭnia ŭ Minsku na płoščy Svabody, na płoščy Niezaležnaści, na praśpiekcie Niezaležnaści, a taksama ŭ Breście supracoŭnikami orhanaŭ unutranych spraŭ byli zatrymanyja 47 žurnalistaŭ.
