Alaksandr Łukašenka 9 vieraśnia niečakana pryznačyŭ novaha hienieralnaha prakurora. Im staŭ 47-hadovy Andrej Švied, jaki da hetaha ŭznačalvaŭ Kamitet sudovych ekśpiertyz.
«Naša Niva» sabrała najbolš cikavyja fakty pra spadara Švieda. Rezanansnyja spravy, jakimi jon zajmaŭsia, drabnicy ź siamiejnaj bijahrafii.
Andrej Švied. Fota ctv.by.
Andrej Švied naradziŭsia ŭ 1973 hodzie ŭ Hłuškavičach Lelčyckaha rajona. Heta dastatkova vialiki ahraharadok na samym poŭdni Biełarusi. Kab trapić u Hłuškavičy pa trasie, treba abaviazkova prajazdžać terytoryju Ukrainy. Dy što kazać, z troch z čatyroch bakoŭ Hłuškavičy akružanyja Ukrainaj.
Tam viadziecca zdabyča hranitu i ščebniu, na pavierchniu vychodziać staražytnyja archieałahičnyja parody. Pobač vialiki tarfiany zakaźnik. Z Hłuškavičaŭ pachodzić rodam mitrapalit Biełacarkovicki (Ukraina) Aŭhustyn.
Z Hłuškavičaŭ byŭ rodam baćka hienprakurora Ivan Vasilevič. Mama ž trapiła ŭ Lelčycki rajon pa raźmierkavańni. Aboje baćkoŭ pracavali nastaŭnikami ŭ škoły. Zinaida Siamionaŭna vykładała matematyku, a Ivan Vasilevič — byŭ dyrektaram škoły.
Kaciaryna Aŭramaŭna Koval — adna z starejšych nastaŭnic Hłuškavičaŭ. U škole jana pracavała z 1964 da 2004 hadoŭ. Papracavała i sa Šviadami (mienavita tak, praz «ja», kažuć miascovyja žychary — «NN»). «Ivan Vasilevič — załaty byŭ čałaviek, kolki ja adpracavała, ale ni z kim nie paraŭnajecca», — kaža spadarynia Koval.
Baćka hienprakurora zahinuŭ rana i maładym. U vioscy kažuć, što jahonaja žonka nie chacieła žyć u Hłuškavičach, siamja rychtavałasia da pierajezdu na Mahiloŭščynu, radzimu žonki. U adnu z pajezdak na Mahiloŭščynu Ivan i zahinuŭ, mašyna trapiła ŭ avaryju, sutyknułasia ź lesavozam. Vyratavać dyrektara nie zmahli.
Adbyłosia heta naprykancy 1970-ch. Pachavany baćka Švieda ŭ Hłuškavičach. Maci ŭ chutkim časie ŭsio ž źjechała, jana i ciapier žyvie ŭ vioscy Lenina Horackaha rajona. Tam budučy hienieralny prakuror i vyras. U Hłuškavičach Andrej chadziŭ tolki ŭ nulavy kłas.
Taksama cikavaja postać dzieda Andreja Švieda, Vasila. Jon sam rodam z Ukrainy, z susiedniaj vioski Budki-Kamianski Rovienskaj vobłaści. Miascovaja žycharka Jeva Dźmitryjeŭna Švied (nie svajaki, tam pałova vioski z takim proźviščam) raskazvaje, što Vasil pracavaŭ kavalom u kałhasie.
Vasil Švied. Fota z fejsbuka Siarhieja Doŭhušava.
A ŭ volny čas Vasil Švied vyrablaŭ dudki, hraŭ i śpiavaŭ razam ź siabrami. U spadara Vasila było dźvie žonki, abiedźvie pamierli raniej za jaho. Dažyvaŭ svoj viek stary ŭ vioscy Rečań Lubanskaha rajona ŭ syna Andreja.
U ciapierašniaha hienieralnaha prakurora jość starejšaja siastra Anžeła i małodšy brat Aleh. Aboje jany taksama dastatkova vysoka prasunulisia na pasadach. Aleh Švied źjaŭlajecca kiraŭnikom «Miedtechnacentra» — pradpryjemstva, jakoje zajmajecca ramontam i absłuhoŭvańniem miedyčnaha abstalavańnia.
Aleh Švied. Fota produktgoda.by.
Siastra Anžeła Rajemskaja doŭhi čas zastavałasia pry maci ŭ Horackim rajonie, była tam dyrektarkaj škoły. Ciapier ža jana pracuje namieśnicaj staršyni Łahojskaha rajvykankama, adkazvaje za sacyjalnuju śfieru.
Anžeła Rajemskaja. Fota ok.ru.
Žonka Andreja Švieda taksama rodam ź Lelčycaŭ. Mienavita tamu jany tak časta byvajuć u hetym kutku, zajazdžajuć i na mahiłu da baćki.
Ich syn Kirył skončyŭ jurydyčny fakultet BDU. Abaraniaŭsia z dypłomam na temu «Daktyłaskapija: paniaćcie, pradmiet, mahčymaści». Žanaty, haduje maleńkuju dačku. Kali pahladzieć na sacyjalnyja sietki Kiryła, to možna pabačyć amatara padarožžaŭ: Šviejcaryja, Francyja, Polšča, Rasija.
Kirył Švied. Fota vk.com.
Što tyčycca aficyjnaj častki bijahrafii Švieda, to jon skončyŭ jurydyčny fakultet BDU (1996). Paśla pracavaŭ na roznych pasadach u prakuratury Minska i hienieralnaj prakuratury. U 2006 hodzie sychodzić u Radu biaśpieki, dzie ŭznačalvaje ekśpiertna-pravavy adździeł. Kandydackuju dysiertacyju Švied abaraniŭ na temu «Aktualnyja tearetyčnyja i praktyčnyja aśpiekty stadyi zaviadzieńnia kryminalnaj spravy».
U 2010 hodzie Švied pryznačany namieśnikam hienieralnaha prakurora. Z hetaha momantu i pačynajecca imklivaje raźvićcio jahonaj karjery. Mienavita Švied byŭ tym, chto ahučvaŭ detali pa śmierci kaardynatara «Jeŭrapiejskaj Biełarusi» Aleha Biabienina.
Ale samym zornym časam dla siłavika stała rasśledavańnie spravy ab vybuchu ŭ minskim mietro, jaki adbyŭsia 11 krasavika 2011 hoda. Mienavita Švied dapytvaŭ zatrymanych Kanavałava i Kavalova ŭ pieršyja dni paśla teraktu. Jon ža ŭznačalvaŭ abjadnanuju śledčuju hrupu pa hetaj spravie. Potym jon skaža, što Kanavałaŭ i Kavaloŭ panieśli «zasłužanaje pakarańnie». Nahadajem, što ich rasstralali.
U toj samy hod Łukašenka pryznavaŭsia, što pieršym kiraŭnikom Śledčaha kamiteta chacieŭ pastavić mienavita Švieda, ale paličyŭ, što arhanizacyjnaja praca pa stvareńni viedamstva budzie zaminać Šviedu ŭ śledčaj pracy, tamu zrabiŭ jaho namieśnikam Valeryja Vakulčyka.
Zatoje ŭ krasaviku 2013 hoda Švied staŭ pieršym kiraŭnikom Kamiteta sudovych ekśpiertyz.
Letaś Švied apynuŭsia ŭ epicentry miedyjnaha skandału: siłaviki ładzili pieratrus u ofisie telekanała «Biełsat» pavodle kryminalnaj spravy za paklop. Sprava ŭ tym, što ŭ adnoj sa svaich publikacyj žurnalist Aleś Zaleŭski napisaŭ, što Andrej Švied byŭ zatrymany, a heta vyjaviłasia niapraŭdaj. Telekanał paprasiŭ potym prabačeńni, ale čynoŭnik usio adno napisaŭ zajavu ŭ Śledčy kamitet.
Jašče z detalek: Andrej Švied u svoj čas uznačalvaŭ fiederacyju vodnaha poła.
