Fota Nadziei Bužan
Siabra prezidyuma Kaardynacyjnaj rady, były ministr kultury Pavieł Łatuška prakamientavaŭ «NN» čutki ab emihracyi, jakija stali raspaŭsiudžvać praŭładnyja telehram-kanały.
Pavieł Łatuška: Ad ranicy ja znachodžusia ŭ Polščy na zaprašeńnie staršyni prahramnaj rady ekanamičnaha forumu ŭ Krynicy Hurskaj. Heta viadomaja ekanamičnaja sustreča adbudziecca 8-10 vieraśnia, u joj prymajuć udzieł kiraŭniki ŭradaŭ mnohich jeŭrapiejskich krain, pradstaŭniki biznesa roznych krain śvietu.
U mianie zapłanavanyja sustrečy va ŭradzie Polščy, z deputatami parłamienta, u MZS Polščy. Ja taksama płanuju naviedać Vilniu, pravieści tam sustrečy z uradavymi strukturami Litvy, parłamientarami. Maja meta — prainfarmavać pra ŭnutrypalityčnaje i ekanamičnaje stanovišča Biełarusi.
Taksama ja budu zakranać pytańnie dalejšaj dziejnaści Kupałaŭskaha teatra. Heta takoje pryvatnaje pytańnie, ale vielmi važnaje dla mianie.
«Naša Niva»: Ci viadziecca pytańnie ab emihracyi?
Pavieł Łatuška: Nie, absalutna.
Nahadajem, što ŭčora padčas vizitu ŭ Baranavičy Łukašenka zajaviŭ, nie nazvaŭšy imia, nastupnaje: «Niekatoryja z takich čynoŭnikaŭ uvajšli ŭ tak zvanuju Kaardynacyjnuju radu i adkažuć za svaju dziejnaść tam pa zakonie. Pa faktach zachopu ŭłady raspačata kryminalnaja sprava. Voś jon i adkaža pa zakonie, i schavacca nidzie nie zmoža».
