31 žniŭnia aktyvista strajkama «Biełšyny» Vitala Kraśnickaha asudzili pa artykule 23.34 KaAP — za ŭdzieł u niesankcyjanavanym mierapryjemstvie — na 7 sutak, jakija jon adbyvaje ŭ babrujskim IČU. Pra toje, što sud adbyŭsia, svajaki daviedalisia tolki 1 vieraśnia, piša Tut.by.
Uładzisłaŭ, stryječny brat zatrymanaha, raspavioŭ, što pieršapačatkova sprava pavinna było słuchacca apoŭdni 31 žniŭnia ŭ sudzie Babrujskaha rajona i Babrujska na vulicy Tuchačeŭskaha, kudy maładoha čałavieka pryjšli padtrymać haradžanie. Adnak Vitala Kraśnickaha tudy tak i nie dastavili, a jaho proźvišča źnikła sa śpisaŭ tych, čyje spravy razhladalisia ŭ hety dzień.
— My zmahli tolki daviedacca, što ź jaho źniatyja pieršapačatkovyja abvinavačańni pa artykule 17.3 — źjaŭleńnie ŭ hramadskich miescach u niećviarozym stanie, — paviedamiŭ Uładzisłaŭ.
Dniom 1 vieraśnia maci Vitala Kraśnickaha pasprabavała vyśvietlić, što ź jaje synam i kali adbudziecca sud. Jana datelefanavałasia ŭ IČU i spytała, na jakich padstavach utrymlivajecca jaje syn.
— Tam joj i paviedamili, što ŭsio pa zakonie — maŭlaŭ, sud užo adbyŭsia 31 čysła, Vitalu dali 7 sutak.
Kraśnicki byŭ adnym ź niamnohich, chto 19 žniŭnia ŭziaŭ udzieł u strajku na AAT «Biełšyna» i admoviŭsia raspačynać pracu. Paźniej jaho zvolnili za prahuł.
