Viciebskuju aktyvistku i błohiera Alenu Januškoŭskuju aštrafavali na 945 rubloŭ za toje, što jana stajała na bałkonie ź bieł-čyrvona-biełym ściaham i vitała im kałonu mirnych demanstrantaŭ. Pra heta Tut.by paviedamiła dačka žančyny, Julija Ułasienka.
Pa słovach Julii, milicyja pryjechała dadomu da jaje maci 31 žniŭnia. Žančynu abvinavacili ŭ niesankcyjanavanym pikietavańni i pradjavili fota, na jakim taja staić na bałkonie ź bieł-čyrvona-biełym ściaham. U minułuju niadzielu, 30 žniŭnia, Alena Januškoŭskaja takim čynam vitała kałonu mirnych demanstrantaŭ, jakija išli pa praśpiekcie.
1 vieraśnia sud aštrafavaŭ Alenu na 35 bazavych vieličyń (945 rubloŭ) — za ŭdzieł u niesankcyjanavanym pikietavańni.
Noč z 31 žniŭnia na 1 vieraśnia Januškoŭskaja praviała ŭ IČU. Paśla suda jaje znoŭ advieźli ŭ izalatar časovaha ŭtrymańnia — pa niejkaj novaj spravie, jaje sud razhledzić 2 vieraśnia. U čym jašče jaje abvinavačvajuć, pakul što nieviadoma.
Alena Januškoŭskaja maje invalidnaść treciaj hrupy.
