Litaraturnaj premijaj «Hliniany Viales» za 2008 hod uhanaravany prazaik Barys Piatrovič (Sačanka) za knihu minijaturaŭ «Žyć nie strašna».Premiju jamu ŭručyŭ kaardynatar jaje prysudžeńnia Aleś Arkuš u subotu ŭ Połacku ŭ Muziei biełaruskaha knihadruku, u Mižnarodny dzień paezii. Łaŭreata vitali dziesiatki pałačanaŭ i haściej staradaŭniaje stalicy.
U Barysa Piatroviča «Viales» – pieršaja litaraturnaja premija. U svajoj laŭreackaj pramovie jon havaryŭ pra svajo pakaleńnie ŭ biełaruskaj litaratury, pakaleńnie 50‑hadovych, jak pra zamoŭčanaje i niezaŭvažanaje.
Uradženiec paŭdniovaje Homielščyny Piatrovič da pačatku 2000‑ch pracavaŭ spačatku ŭ «LiMie», paśla ŭ «Połymi». Paśla ŭviadzieńnia ŭ vydańniach ideałahičnaha kantrolu pierajšoŭ na volnyja chlaby. Ciapier Barys Piatrovič redahuje niezaležny litaraturny časopis «Dziejasłoŭ». Jon aŭtar fiłasofskaje prozy.
«Hliniany Viales» byŭ zasnavany Tavarystvam volnych litarataraŭ na pačatku 90-ch jak procivaha zanadta tradycyjanalisckim hustam adboru na premii dziaržaŭnyja.Premija prysudžajecca za najlepšuju knihu. Łaŭreata abiraje koła krytykaŭ. U minułyja hady premijaj byli adznačanyja jak viadomyja tvorcy - Aleh Minkin, Ludka Silnova, Aleś Razanaŭ, Uładzimier Arłoŭ, Ihar Babkoŭ, tak i niečakanyja aŭtary z małych viosak i haradkoŭ, jak Mikoła Papieka.
0
0
0
0
0
0