«Rosatom» stanie hienieralnym padradčykam budaŭnictva. Pra heta paviedamiŭ dyrektar departamienta pa raźvićci jadziernaj enierhietyki Ministerstva enierhietyki Mikałaj Hruša.
Pieramovy z rasijskim bokam projduć u pačatku 2009 hodu.
Ź jahonych słovaŭ, biełaruskaja administracyja nie mieła inšaha vychadu, bo atrymała prapanovu tolki ad rasijskaj kampanii. U svaju čarhu, pasoł Francyi ŭ svoj čas źviarnuła ŭvahu, što tendernaja prapanova była sfarmulavana takim čynam, što jaje vykanać moh tolki «Rosatom», bo tolki rasijskaja kampanija buduje reaktary zaprošvanaha typu. Francuzskaja «Areva» i amierykanska-japonskaja karparacyja vyrablajuć reaktary inšaha pakaleńnia.
Nahadajem, što ŭ minułuju piatnicu było kančatkova pryniata rašeńnie, što atamnaja elektrastancyja ŭ Biełarusi budzie zbudavana miž miastečkami Michališki i Varniany ŭ Astravieckim rajonie (Hrodzienskaja vobłaść). Heta ŭsiaho za 30—40 km ad Vilni — stalicy Vialikaha Kniastva Litoŭskaha i pierliny ŭ nacyjanalnaj spadčynie narodaŭ VKŁ, a taksama i za 30-40 km ad najbolšaha voziera krainy, Naračy. Hetaja adlehłaść vyhladaje złaviesna, kali ŭličyć, što 30-kiłamietrovaja zona vakoł Čarnobylskaj AES stała nieprydatnaj dla pražyvańnia čałavieka na stahodździ.
Astravieckaj placoŭcy addali pieravahu pierad alternatyŭnymi varyjantami Bychava j Čavusaŭ.
Pradkazalny vybar rasijskaha padradčyka byŭ abvieščany adrazu paśla pieramovaŭ Alaksandra Łukašenki ŭ Maskvie, vynikam jakich stała abiacańnie čarhovy hod pastaŭlać u Biełaruś haz «pa prymalnych cenach».Režym Alaksandra Łukašenki atrymlivaje šmatmiljardnyja datacyi ad Maskvy ŭzamien za doŭhaterminovuju pryviazku biełaruskaj haspadarki da Rasii praz poŭnuju zaležnaść ad pastavak enierhanośbitaŭ i vyhadnuju Maskvie zamiežnuju i kulturnuju palityku.
Mnohija biełaruskija navukoŭcy i ekołahi krytykavali jak samo rašeńnie ab pabudovie AES u Biełarusi, tak i vybar rasijskich technałohij. Adzinaj miehakatastrofaj u historyi atamnaj enierhietyki staŭ vybuch na Čarnobylskaj AES, zbudavanaj akurat savietami.
