— Katastrofa! — u kabiniet načalnika ŭ prezidenckaj administracyi ŭvarvaŭsia jaho namieśnik. — Paštovyja skryni rasijskich pali¬tykaŭ atakujuć spamam — nihieryjskimi listami.
— Što? — nie zrazumieŭ haspadar kabinietu. Jakija listy? Jakija niehry?
— Nihieryjskija listy — heta forma krucielstva. Ich aŭtary prapanujuć adrasatu niejkija pasłuhi, kali toj papiarednie pieraličyć hrošy na ich rachunak. Naturalna, kidałava.
— I što? Jany žadajuć pradać Ziuhanavu vijahru, a Žyrynoŭskamu — srodak, jaki pavialičvaje rejtynh na 20 sm?
— Horš! Pačytajcie sami, — namieśnik dastaŭ niekalki arkušaŭ.
Toj prabiehsia vačyma pa tekście: «Šanoŭny mister rasijski palityk, piša Vam Abubakar Havon, pravadyr narodu Jumba‑Mumba. U subotu šaman zajaviŭ, što boh Malimba zahadaŭ nam pryznać Abchaziju i Paŭdniovuju Asieciju. Praŭda, na šlachu dypłamatyčnaha pryznańnia ŭźnikli techničnyja pytańni, źviazanyja z adkryćciom našaha konsulstva ŭ Cchinvali. Treba drobiaź — dva miljardy dalaraŭ. U znak dokazu našaj česnaści hatovyja na pieršym etapie ŭziać miljard. Druhi — kali vykanajem uvieś pakiet abiacanaha. Z najlepšymi pažadańniami, maja vialikaść Abubakar Havon» .
Nastupny tekst byŭ nie lepšy: «Šanoŭny mister rasijski palityk. Piša Vam Ibrahim Babanhidanavu, prezident Abjadnanych astravoŭ Słanovaj Kości. Moj urad hatovy zaklučyć z RF damovu pra sumiesnuju sistemu pavietranaj abarony i pierajści na adzinuju valutu (rasijski rubiel). Praŭda, na šlachu intehracyi ŭźnikli techničnyja pytańni, źviazanyja ź pierachodam z našaj tradycyjnaj valuty — skurak lemuraŭ, na rasijskija hrošy. Treba drobiaź — dva miljardy dalaraŭ. U znak dokazu našaj česnaści hatovyja na pieršym etapie ŭziać miljard. Druhi — kali vykanajem uvieś pakiet. Z najlepšymi pažadańniami».
Da aparatčyka dajšło. «Praz hetych Abukabaraŭ my možam nie atrymać ničoha ad Rasii. Jość užo ich reakcyja na ich listy?»
Namieśnik pahladzieŭ u papierki: «Pavodle dadzienych našaha pasolstva, pazaŭčora Baradzin skazaŭ, što «rasijska‑iumba‑mumbaŭskaje siabroŭstva — prykład intehracyi dla postsavieckaj prastory, a z časam da jaho padklučacca ŭsie krainy Jeŭrasajuzu».
Značyć tak, — kiraŭnik uziaŭ siabie ŭ ruki. — Ciapier tvajo proźvišča nie Kaviakoŭ, a Havon, ty prync Mumba‑Jumby. Pišy rasijanam, što hatovy intehravacca ź imi za paŭtara miljarda.
Pakul addavalisia rasparadžeńni, na paštovuju skryniu načalnika pryjšoŭ list z nastupnym źmiestam: «Šanoŭny mister biełaruski palityk. Piša Vam, Ivan Ivanoŭ, adzin z supracoŭnikaŭ administracyi «Hazpromu». Ja vialiki amatar intehracyi našych narodaŭ i mahu paspryjać tamu, što cana na haz dla Vašaj krainy ŭ nastupnym hodzie budzie 5 dalaraŭ za tysiaču kubamietraŭ. Praŭda, na šlachu intehracyi ŭźnikli techničnyja pytańni, źviazanyja z tym, što treba ŭłahodzić spravu z Hrefam i Čubajsam. Patrebna drobiaź — dva miljardy dalaraŭ. U znak dokazu našaj česnaści, hatovyja na pieršym etapie ŭziać miljard. Druhi — kali vykanajem uvieś pakiet abiacanaha. Z najlepšymi pažadańniami, słavianafił Ivan Ivanoŭ».
