Carkoŭnaje śviata Uviadzieńnie Baharodzicy ŭ chram pieršy raz uzhadvajecca ŭ letapisach VII—VIII stst. Śviatyja praviednyja Iaakim i Hanna staranna malilisia Bohu, kab jon padaravaŭ im dzicia, abiacajučy pryśviacić jaho słužeńniu Hospadu pry chramie. Boh pačuŭ ich malitvu, i ŭ ich naradziłasia dačka, jakoj dali imia Maryja. Kali joj spoŭniłasia try hady, Iaakim i Hanna vykanali svajo abiacańnie i pryviali trochhadovuju Maryju ŭ Iierusalimski chram. Jany pavinny byli prajsci 15 davoli vysokich prystupak. Baćka chacieŭ uziać dziaŭčynku na ruki, ale jana sama lohka pabiehła navierch. U hetym chramie jana atrymała adukacyju i vychavańnie. Pa zvyčai, praz paśviačeńnie prachodzili tolki pradstaŭniki mužčynskaha połu, ale dla Śviatoj Dzievy było zroblena vyklučeńnie. U honar hetaj padziei ŭ V ci VI st. u Iierusalimie byŭ pabudavany chram, jaki stajaŭ na tym samym miescy, dzie niekali žyła Dzieva Maryja.
Asablivaje ŭšanavańnie žančyn u hety dzień nabližała śviata Uviadzieńnia da inšych «žanočych śviataŭ» — Pakrovaŭ i dnia ŭšanavańnia Paraskievy Piatnicy.
«Viedziańnio — kab było ŭ dzievak piciańnio i jedziańnio» — na Uviadzieńnie, Novy hod i Troicu dziaŭčaty zbiralisia na hulanni i «kumilisia», h.zn. vybirali sabie siabroŭku.
Z hetaha dnia paŭsiudna raspačynalisia zimovyja, Uviadzienskija, handli i kirmašy.
Dla taho, kab naładzić ułaziny, treba było vybrać samy spryjalny, «ščaslivy» dzień. Kali budaŭnictva raspačynałasia napiaredadni Troicy, to pierachod u novuju chatu, ułaziny, treba było pravodzić vosieńniu ci na pačatku zimy. Ličyłasia, što śviaty Simiaon, jaki ŭšanoŭvajecca 14 vieraśnia, pryniasie novaj chacie i jaje žycharam ščaście i radaść. Taksama spryjalnym dniom dla ŭłazin ličyŭsia dzień Uviadzieńnia Baharodzicy ŭ chram — 4 śniežnia.
Pa nadvor'i hetaha dnia pradkazvali, što budzie nadalej:
Uviadzienskija marazy rukaŭki na mužyka apranuli, ściužu pryviali, zimu na rozum nastavili.
Kali da Uviadzieńnia pojdzie śnieh, to jon chutka rastanie.
Kali śnieh pojdzie paśla Uviadzieńnia, to laža zima.
Na Uviadzieńnie maroz — usie śviaty maroznyja, ciopła — i śviaty ciopłyja.
Mocnyja zazimki pavinny być u hety ci ŭ nastupny dzień.
